ПРИМИРЈЕ ИЗРАЕЛ-ЛИБАН, ВЕДНАШ ПАДНА ДРОН Сериозна грешка, загрме израелски министер

Неколку лица беа ранети кога беспилотно летало погоди возило во јужен Либан. Нападот се случи само кратко време по договорот за прекин на огнот меѓу Израел и Либан. Примирјето доаѓа по серија разговори во Вашингтон.

Прашањата меѓу земјите остануваат отворени по нападот.

Либанската национална новинска агенција објави дека цел на нападот било возило кое се движело во јужниот дел од земјата.

Хезболах негодува, договорот виси

Неизвесно останува дали Хезболах ќе се согласи да се повлече јужно од реката Литани, што е едно од клучните барања на Израел. Милитантната група претходно ги осуди мировните разговори и покажа резерви кон предложеното решение.

„Двете страни, под водство на Соединетите Американски Држави, се согласија итно да воспостават пилотски зони во кои либанските вооружени сили ќе ја преземат ексклузивната контрола врз територијата, без присуство на какви било недржавни актери“, се наведува во заедничкото соопштение.

Под поимот „недржавни актери“ се мисли на Хезболах, организација поддржана од Иран која со години дејствува во јужен Либан и е редовно цел на израелски напади.

„Сериозна грешка“

Израелскиот министер за национална безбедност Итамар Бен-Гвир жестоко го нападна договорот и оцени дека тој може да има спротивен ефект.

„Сериозна грешка и празен сон на советници кои го влечат премиерот во погрешни одлуки“, напиша Бен-Гвир на Икс.

Тој предупреди дека Хезболах може дополнително да зајакне.

„Хезболах само ќе станува посилен, а Израел, наместо да го порази, ќе се помири со неговото постоење“, наведе министерот.

Бен-Гвир додаде дека Израел понекогаш мора да им се спротивстави и на своите најблиски сојузници.

– Има моменти кога дури и претседателот на Соединетите Американски Држави треба да знае како да каже „не“ – изјави тој.

Преговори, Иран, неизвесност

Договорот меѓу Израел и Либан може да има пошироки последици и за разговорите меѓу Вашингтон и Техеран. Иран претходно порача дека не гледа простор за пошироко примирје доколку во него не биде вклучен и Либан.

Американскиот претседател Доналд Трамп во изминатите денови најавуваше можност за нов дипломатски пробив. Сепак, иднината на иранската нуклеарна програма и натаму останува едно од најспорните прашања.

Стар договор, стари сомнежи

Скептицизмот околу новото примирје дополнително го потхранува фактот што Израел и Либан веќе постигнаа сличен договор во април. Тој подоцна беше продолжен до мај, но не успеа целосно да ги запре судирите.

Околу 1,2 милиони луѓе ги напуштија своите домови за време на израелската офанзива во јужен Либан. Израелските сили и денес остануваат во делови од безбедносната зона, додека судирите со Хезболах периодично продолжуваат.