ПОЛОВИНА ОД ПРОИЗВЕДЕНАТА НАФТА ВЕНЕЦУЕЛА ЈА ИЗВЕЗУВА ВО САД Америка секој ден по 500.000 барели
Од САД во Венецуела дневно се испорачуваат повеќе од 100.000 барели лесна нафта, којашто потоа се меша со тешката венецуелска нафта, за да се олесни нејзиното производство, вели заменик-министерот за енергетика на САД.
Околу половина од нафтата што моментално се произведува во Венецуела се извезува во САД, изјави заменик-министерот за енергетика на САД, Кајл Хауствајт, наведувајќи дека земјата дневно произведува околу 1,25 милион барели нафта.
– Во изминатите неколку месеци повеќе од 500.000 венецуелски барели дневно, односно приближно половина од производството на таа земја, се испорачуваат во САД, во рафинерии изградени токму за тој вид нафта – изјави Хауствајт на настан во Хјустон.
Од САД, пак, во Венецуела дневно се испорачуваат повеќе од 100.000 барели лесна нафта, којашто потоа се меша со тешката венецуелска нафта, за да се олесни нејзиното производство, додаде заменик-министерот за енергетика.
– Тоа е одлично енергетско партнерство. Има смисла со оглед на растојанијата. Работиме на отворен пазар. Вистинската вредност се создава на двете страни од трговијата. Мислам дека нема поедноставно партнерство – посочи Хауствајт.
Американскиот функционер го истакна напредокот што го постигна Венецуела и нагласи дека неповредливоста на договорите ќе биде почитувана.
На американската економија ѝ се неопходни тешките фракции на венецуелската нафта, изјави на истиот настан потпретседателот на венецуелската државна нафтена компанија ПДВСА, Џовани Мартинез.
– До крајот на август производството на нафта во Венецуела ќе достигне 1,245 милиони барели дневно – соопшти Мартинез.
Од почетокот на годината извозот на нафта од Венецуела е зголемен за 19,7 отсто.
– За производство на потешки фракции нафта на Венецуела ѝ се потребни средства за разредување што би требало да се произведуваат во земјата. Потребно е и унапредување, модернизирање и проширување на венецуелските рафинерии – рече Мартинез.
Тој додаде дека производството на гориво во Венецуела од почетокот на годината е зголемено за 12,9 отсто, додека домашните рафинерии сега испорачуваат 5,4 отсто повеќе гориво на домашниот пазар.
– Вложивме големи напори во енергетската реформа и сега очекуваме конкретни резултати во развојот – рече Мартинез.