ОРЕЛОТ НА БЕНФИКА ВО ЦЕНТАРОТ НА ГОЛЕМ СКАНДАЛ СО КОКАИН Соколарот што го чувал паднал во полициска акција

Бизарна врска меѓу еден од најпознатите фудбалски симболи во Португалија и голема полициска операција за шверц на дрога го тресе Лисабон.

Жоао Пауло Сантос (46), соколар кој повремено работел со птиците грабливки на Бенфика и го чувал славниот орел Викторија на еден натпревар минатата сезона, е во притвор под сомнение дека бил дел од мрежа за внесување кокаин во Европа преку аеродромот во Лисабон.

Името на полициската акција звучи речиси неверојатно во контекст на неговата професија – „Операција Сокол“.

Португалската полиција во акцијата запленила околу 110 килограми кокаин, 200.000 евра во готовина, повеќе возила и други предмети и документи важни за истрагата. Уапсени се двајца мажи, на возраст од 46 и 48 години, осомничени дека биле дел од криминална организација која внесувала големи количества кокаин во Европа со комерцијални летови од Латинска Америка.

Токму работното место на Сантос е најнеобичниот детал во приказната.

Тој работел како соколар на аеродромот „Умберто Делгадо“ во Лисабон. Неговата легална задача била со птици грабливки да ги оддалечува помалите птици од пистите и така да го намалува ризикот за авионите.

Но, истражителите се сомневаат дека токму пристапот до аеродромската зона бил искористен во шемата за шверц.

Според досега објавените информации, куфери наполнети со кокаин пристигнувале со авиони од Латинска Америка. Наместо да продолжат по нормалниот пат за преземање и контрола на багажот, тие наводно биле тргнувани од редовниот систем веднаш по слетувањето.

Другиот осомничен, 48-годишен работник задолжен за аеродромско опслужување и багаж, наводно соработувал со Сантос во шемата. Португалската полиција го истражувала случајот околу четири месеци пред апсењата.

Двајцата по првото сослушување се испратени во притвор, а истрагата продолжува за да се утврдат размерите на мрежата и потеклото на кокаинот.

Токму тука приказната добива фудбалски пресврт.

Сантос работел за компанија која повремено обезбедувала услуги за дресура и грижа за птиците грабливки што Бенфика ги користи на натпреварите и на други настани.

Минатата сезона тој бил задолжен за орелот Викторија на еден натпревар на стадионот „Да Луж“, а присуствувал и на други настани на клубот.

Но, првичните информации дека станува збор за официјалниот дресер на славниот орел подоцна биле коригирани.

Бенфика има свој официјален дресер на птиците, кој, според португалските медиуми, нема никаква врска со криминалниот случај што се истражува. Сантос бил само повремено ангажиран преку надворешна компанија, пишува Обсервадор.

Орелот Викторија е еден од најпрепознатливите симболи на Бенфика. Пред натпреварите на „Да Луж“, птицата традиционално лета над теренот пред да слета кај клупскиот грб.