РКЕ: Ќе нема исклучување од струја, парно и вода во време на вонредната состојба
Од РКЕ порачуваат дека се во разговори со компаниите да се изнајде најдобар модел за плаќање на сметките за режиски трошоци за март, април и мај со цел, како што велат, да не им бидат на товар на потрошувачите.
Останува во сила препораката што пред две недели ја упативме до компаниите вршители на енергетски дејности, како и до јавните претпријатија што се даватели на водни услуги да се воздржат од исклучување на граѓаните од соодветните системи за снабдување со електрична енергија, топлинска енергија и вода поради неплатени сметки додека трае вонредната состојба поради пандемијата со Ковид 19, информира Регулаторна комисија за енергетика и водни услуги (РКЕ).
– Практично со ова известување сакам да им соопштам на граѓаните да бидат сигурни дека нема да има исклучување од струја, парно и вода додека вонредната состојба е на сила. Во исто време сакам да изразам благодарност до компаниите и јавните претпријатија чие работење е под надлежност на РКЕ кои веднаш позитивно одговорија на препораката и во овој периодот покажуваат солидарност и општествена одговорност кон потрошувачите – изјави Марко Бислимоски, претседател на РКЕ.
Од РКЕ порачуваат дека се во разговори со компаниите да се изнајде најдобар модел за плаќање на сметките за режиски трошоци за март, април и мај со цел, како што велат, да не им бидат на товар на потрошувачите.
Најавуваат дека јавноста ќе биде информирана откако ќе се постигне евентуален договор за конечниот модел.