ЗЕЛЕНСКИ ПОДГОТВЕН ДА СЕДНЕ СО ПУТИН Украинскиот претседател постави услов што може сè да промени

Украина е подготвена за директни преговори со Русија, но само откако ќе стапи во сила прекин на огнот, изјави украинскиот претседател Володимир Зеленски во Киев, што би било прв ваков контакт по повеќе од две години откако започна руската инвазија.

– По воведувањето прекин на огнот, ние сме подготвени да седнеме (на преговори) во кој било формат – порача Зеленски на заедничка прес-конференција, на прагот на новиот состанок кој ќе се одржи во Лондон, каде што ќе учествуваат американски, украински и европски претставници. Целта е да се воспостави прекин на огнот и да се отвори патот за можен мировен договор.

Ова е прва официјална најава од Киев за подготвеност за директен дијалог со Москва откако последните разговори во пролетта 2022 година завршија без резултат.

Во исто време, рускиот претседател Владимир Путин неодамна ја отвори вратата за можност за нови преговори со Киев, потенцирајќи дека е можно договарање прекин на огнот, најпрво со ограничување на нападите врз цивилна инфраструктура.

Од другата страна на Атлантикот, САД водат одвоени разговори и со Киев и со Москва. Белата куќа потврди дека специјалниот пратеник на американскиот претседател Доналд Трамп, Џон Виткоф, ќе ја посети Москва оваа недела – што ќе биде негова четврта посета откако Трамп ги обнови дипломатските контакти со Русија во февруари.

Трамп, кој неколкупати изјави дека сака итен крај на војната, во неделата порача: „Се надевам дека двете страни ќе постигнат договор уште оваа недела.“