ОДБОЈКАРИТЕ ОД СОФИЈА ЗАМИНУВААТ KAKO ПОБЕДНИЦИ Израел падна со 3-0 за македонска радост
По четири порази без освоен сет, избраниците на Јошко Миленкоски го одиграа најдобриот натпревар на Европското првенство и со чиста победа го завршија настапот.
Македонската одбојкарска репрезентација со победа го заврши настапот на Европското првенство во Софија. Избраниците на селекторот Јошко Миленкоски попладнево го совладаа Израел со максимални 3-0 во последното, 5. коло од групата Б.
Македонија конечно ја покажа играта што недостигаше во претходните четири натпревари. Подобриот сервис и посигурната игра на мрежа донесоа предност од 10-5 и 14-9 во првиот сет.
Израел успеа да се врати до 19-19, но македонските одбојкари одговорија со три поени во серија. Сетот заврши 25-21, а Македонија конечно го освои првиот сет на ова Европско првенство.
Во вториот сет беше израмнето до 12-12. Потоа Македонија направи нова серија, поведе со 16-12 и 19-15 и ја искористи третата сет-топка за 25-23.
Македонските одбојкари не му дозволија на Израел да се врати ниту во третиот сет. Поведоа со 14-10, ја сочуваа предноста до крајот и ја запечатија единствената победа на турнирот.
Капитенот Никола Ѓоргиев беше најефикасен со 20 поени, а Стојан Илиев додаде 14. Македонија го заврши натпреварувањето како петтопласирана во групата Б и ги избегна последните четири позиции во конечниот пласман.
Европското почна сосема поинаку од тоа како заврши. На 9 септември Македонија го отвори настапот токму во Софија против домаќинот Бугарија и загуби со 3-0. Потоа следуваа порази без освоен сет од Украина, Полска и Португалија, пред денешните 3-0 против Израел.