📽️ ЏУД БЕЛИНГАМ ВО ДОЛНА ОБЛЕКА НА КЕЛВИН КЛАЈН Фудбалерот ги запали социјалните мрежи
Ѕвездата на Реал Мадрид е новото заштитно лице на познатиот моден бренд. Рекламата во која ги покажува мускулите веќе предизвика лавина реакции, а обожавателите не го кријат воодушевувањето.
Ако некој знае како да направи реклама за која ќе зборува целиот свет, тогаш тоа е модниот бренд „Келвин Клајн“. Нивните провокативни кампањи со познати личности со децении привлекуваат огромно внимание, а најновата ѕвезда во нивната препознатлива приказна е фудбалерот Џуд Белингам.
Дваесет и тригодишниот англиски репрезентативец и играч на Реал Мадрид се појавува во новата кампања за линијата долна облека „Icon Cotton Stretch“, а фотографиите и видеото веќе предизвикаа вистинска еуфорија на социјалните мрежи. Белингам позира во неколку модели долна облека, а во преден план се неговата атлетска градба и обликуваните стомачни мускули.
Со оваа кампања тој се приклучи на долгата листа познати мажи кои претходно соработувале со брендот, меѓу кои се Мајкл Б. Џордан, Џастин Бибер, Џереми Ален Вајт и Бед Бани.
– Икона под облеката. Џуд Белингам, икона меѓу нашите икони. Чиста удобност. Постојана поддршка. Безвременски стил – порача брендот во објавата на Инстаграм.
View this post on Instagram
Белингам откри дека уживал во снимањето и дека особено му се допаднала идејата зад кампањата – самодовербата што произлегува од тоа човек да се чувствува удобно во сопствената кожа.
– Навистина уживав работејќи на оваа кампања. Ми се допадна идејата за „иконата под облеката“ – идејата дека самодовербата произлегува од чувството на удобност во сопствената кожа. Келвин Клајн е култен бренд, па беше одлично да ја претставам таа замисла на свој начин – изјави британскиот фудбалер за „Космополитен“.
Соработката беше најавена уште пред официјалното објавување на кампањата, со големи билборди во Њујорк и најава на социјалните мрежи. Иако на првите фотографии не се гледаше лицето на моделот, на фановите не им требаше многу време да препознаат дека станува збор за Белингам.