📽️ СЕ СЛУШААТ КРИЦИ И ПЛАЧ НА ПИЛОТОТ, А ПОТОА ЦЕЛОСЕН МОЛК Објавена вознемирувачка снимка од разговорот со контролата на летање додека паѓал авионот

Девет лица загинаа во неделата, откако приватен авион „Learjet 60“ се урна во округот Палм Бич, во американската сојузна држава Флорида, соопштија Федералната управа за воздухопловство (FAA) и надлежните служби.

Иако за несреќата се водат неколку истраги, аудиоснимките од комуникацијата меѓу контролата на летање и пилотот откриваат вознемирувачки детали за последните моменти од летот.

Страшни последни моменти во пилотската кабина

 

“Holy f*ck, we’re out of time” Heart crushing ATC audio captures the moments before a Learjet 60 crashed in Palm Beach County, Florida, killing all 9 souls on board.

VIA: @thenewarea51 https://t.co/CWOtYjJqef

— Breaking911 (@Breaking911) November 1, 2026

Разговорот меѓу пилотот и контролата на летање започнал со информации за временските услови и состојбата на авионот.

Контрола на летање: „Колкава е надворешната температура на воздухот?“

Пилот: „Минус 47 степени Целзиусови. Успеваме да се справиме со мразот, но има умерени турбуленции.“

Контрола на летање: „Известете ме ако ви треба уште нешто. Токму сега ве воведувам во мојот воздушен простор.“

Пилот: „Сега наидуваме на врнежи. Мораме да се искачиме на поголема висина.“

Контрола на летање: „Разбирам. Искачете се и одржувајте ја висината.“

Неколку моменти подоцна, ситуацијата драматично се влошила. Пилотот пријавил дека авионот неконтролирано губи висина и побарал помош.

Пилот: „Пропаѓаме од 8.000 стапки. Мајдеј, мајдеј! Пропаѓаме со брзина од 10.000 стапки во минута. Прогласувам вонредна состојба, 722 Браво Делта. Се наоѓаме над вода, пропаѓаме со брзина од 20.000 стапки во минута.“

Контрола на летање: „Кажете ми што ви е потребно.“

Пилот: „Ќе удриме во земјата.“

Контрола на летање: „Новембер два Браво Делта. Тука сум со вас. Разговарајте со мене.“

Пилот: „Пропаѓаме од 22.000 стапки, а авионот е навален под агол од 60 степени.“

Во снимката потоа се слуша неразбирливо врескање на пилотот, по што тој извикува: „Погледнете надвор“.

Контролорот повторно се обидува да воспостави комуникација.

Контрола на летање: „Новембер два Браво Делта. Ме слушате ли?“

Потоа следува целосен молк.

Гувернерот на Флорида, Рон ДеСантис, се осврна на трагедијата за време на прес-конференција во неделата, опишувајќи ја несреќата како катастрофална.

– Очигледно станува збор за катастрофално уривање на авион. Изгледаше како да паѓа проектил – изјави ДеСантис.

Тој додаде дека авионот направил голем кратер покрај патот.

Надлежните сè уште не го објавиле идентитетот на деветте лица што загинале во авионот.

ДеСантис во обраќањето во неделата изјави и дека официјалните лица сè уште не знаат дали некој од патниците или членовите на екипажот бил жител на Флорида.