Советничката Колариќ од ВМРО-ДПМНЕ: Шилегов, каде се парите од Градската куќа?

Нема да им биде простено што Шилегов ја продаде Градската куќа за 13 милиони евра , а општинската администрација е сместена во дотраени бараки, настрана што не ги видовме парите од таа продажба, реагираше вечерва Светлана Колариќ, советничка во Град Скопје од ВМРО-ДПМНЕ во емисијата „Само вистина“ на Канал 5 каде беше гостинка заедно со скопскиот градоначалник Петре Шилегов.

Таа го праша Шилегов, како може да се објави јавен повик за изградба на парк на место каде што во моментот е објектот Универзална сала.

– Во 2018 година, токму градоначалникот Петре Шилегов седна со тогашниот министер Алаѓозовски и тие се договорија да изградат Универзална сала. Дали кога се договараа и потпишуваа договор, градоначалникот тогаш постојано излегуваше во јавноста и кажуваше дека ќе се гради Универзална сала, дали тогаш имаше отворена дебата и се слушна мислењето на граѓаните? Одговорот е не. Во 2019 година ние повторно предвидовме пари во Буџетот на Град Скопје за проект за Универзална сала. Еве помина и 2019 година и ништо. Сега, 2020 година кажува градоначалникот дека добил пари од Министерството за култура, а исто така и ние во буџетот издвоивме пари за проектот на Универзална сала. И сега се сведува дека на 24 јули е објавен јавен повик за летна тераса со парк Универзална сала во градска четврт 14. Нека ми одговори Петре Шилегов, во постојниот ДУП на местото на Универзална сала што е впишано, односно што е нацртано – вели Колариќ.

Дали е нацртано летна тераса со парк или е нацрт објект на Универзална сала? Како може да се објавува јавен повик за парк на место на кое што во моментот е објектот Универзална сала, го праша Колариќ градоначалникот Шилегов.

Колариќ рече дека жителите на општина Центар не може да го видат другиот Детален урбанистички план кој што е објавен на страницата на општина Центар, обвинувајќи дека нешто се крие од граѓаните.