СИНГАПУР ИМ ПЛАЌА НА ГРАЃАНИТЕ ДА ЧИТААТ КНИГИ Доволно е да се чита само 15 минути во денот

Сингапур започна петгодишна национална кампања за враќање на граѓаните кон книгите и охрабрување да читаат најмалку 15 минути на ден. Учесниците го евидентираат времето поминато во читање, собираат поени и можат да ги заменат за пари, но заработката е симболична – за еден сингапурски долар, треба да читате 50 дена.

Кампањата ReadSG ја започна Националниот библиотечен одбор (NLB) на Сингапур, загрижен за пократките распони на внимание и намалениот интерес за содржини што бараат подолга концентрација.

Програмата се потпира на елементи карактеристични за видео игрите: лични цели, низи од последователни денови за читање, поени за искуство и виртуелни монети.

Организаторите се надеваат дека следењето на напредокот, малите награди и чувството на учество во заедничка акција ќе им помогнат на граѓаните да го претворат читањето во секојдневна навика.

– Додека кратката содржина ни помага да останеме информирани, читањето подолги текстови го зајакнува вниманието, критичкото размислување и имагинацијата – изјави за CNN раководителката на NLB, Мелиса Там.

Целта, додаде таа, е да се создаде нација од љубопитни, внимателни и перцептивни читатели, подготвени да се снајдат во сè посложен свет

Учесниците ја евидентираат секоја сесија за читање што трае најмалку 15 минути на државната онлајн платформа CrowdTaskSG. Тие добиваат 20 виртуелни монети за тоа и можат да регистрираат само една сесија дневно.

За еден сингапурски долар треба да соберете 1000 монети. Ова значи дека можат да добијат награда од еден долар, или околу 60 евро центи, по 50 дена читање.

Програмата, според тоа, нема да ги збогати љубителите на книги, но парите не се нејзина главна цел. Поважна е идејата за разложување на читањето на едноставни и остварливи дневни задачи. Петнаесет минути се доволно кратки за да се вклопат во возење со автобус, пауза за ручек или спиење, и доволно долго за читателот да се оддалечи од кратки објави, видеа и бесконечно скролање на социјалните медиуми.

-За некој што чита многу, 15 минути може да изгледаат многу кратки, но мислам дека е добра мерка – изјави з Лох Чин И од Националниот институт за образование на Сингапур, кој ги истражува навиките за читање.

Кампањата во Сингапур доаѓа во услови на растечка загриженост за таканареченото „гниење на мозокот“, термин што се користи за да се опише слабеењето на концентрацијата и другите когнитивни способности поради прекумерна консумација на површна интернет содржина.

Проблемот е поврзан со постојано префрлање на вниманието помеѓу кратки видеа, известувања, објави и вести и компулсивно следење на негативна содржина, познато како doomscrolling.

Сингапур сè уште е на врвот на ранг-листата за писменост за читање на меѓународните тестови. Сепак, експертите предупредуваат дека учениците често губат интерес за читање за задоволство кога почнуваат да се подготвуваат за потешки испити.

Кампањата ReadSG трае пет години, а во првиот период целта е да привлече 150.000 корисници. Таа беше лансирана како дел од првиот Национален месец на читање во Сингапур, со поддршка на повеќе од 40 владини институции, образовни организации, медиуми, издавачи и партнери.

Програмата предизвика дебата за тоа дали паричната награда може да развие трајна љубов кон читањето. Критичарите веруваат дека луѓето треба да читаат за задоволство и знаење, а не за поени и пари. Поддржувачите одговараат дека во ерата на алгоритми и постојано одвлекување на вниманието, секоја иницијатива што ги враќа луѓето кон книгите е корисна.

Истражувањата покажуваат дека паричните награди можат да го поттикнат однесувањето, но исто така и да ја ослабнат внатрешната мотивација кога ќе исчезнат.

Клиничкиот психолог Чариса Нг предупредува дека ваквите стимулации се најефикасни за луѓето кои веќе покажуваат барем некаков интерес за книги. За оние кои воопшто не сакаат да читаат, дури ни парите можеби не се доволни за да развијат трајна навика. Затоа Сингапур смета не само на заработката, туку и на конкуренцијата, заедничките цели, добротворните акции и чувството за напредок.