4 МИЛИОНИ ЕВРА ЗА НОВИ „ОЧИ И УШИ“ НА МАКЕДОНСКАТА ЦАРИНА Стигнаа 26 специјални возила, форензичка опрема и возило за приведени

Четири милиони евра се вложуваат во нови „очи и уши“ на македонската Царина. Опремата денеска беше претставена на царинскиот терминал Табановце во присуство на премиерот, министерката за финансии и амбсадарот на ЕУ.

Пакетот носи опрема за откривање шверц, форензичка технологија и нова информатичка инфраструктура.

Царинските тимови добиваат и 26 специјализирани возила. Меѓу нив има возила за мобилните и К9 тимовите. Набавено е и посебно возило за транспорт на привремено задржани лица.

Инвестицијата ја финансира Европската Унија преку четири проекти.

– Да се занимавате со криминал мора да биде неисплатлива работа – порача премиерот.

Мицкоски предупреди и на поединци во институциите кои му помагаат на криминалот. Според него, таквите случаи мора да останат исклучок.

Новата опрема ќе открива шверц

Директорот на Царинската управа, Бобан Николовски, очекува поефикасни контроли. Според него, опремата ќе помогне и во откривањето шверц.

Новите возила ќе ги користат секторите за контрола и истраги. Дел се наменети за мобилните царински и К9 тимови.

Царината добива специјализирана опрема за контроли и истраги. Дел од пакетот е наменет за откривање недозволена трговија.

Набавена е и форензичка опрема за истражните тимови. Новите алатки треба побрзо да ги препознаваат ризичните пратки и случаи.

Царината наплати 10,5 милијарди денари

Амбасадорот на ЕУ, Михалис Рокас, ја стави инвестицијата и во економски контекст. Европската Унија учествува со 76 отсто во македонскиот извоз.

Целта е побрзо движење на стоката и побезбедни граници. „Зелените коридори“ треба дополнително да го намалуваат времето на чекање.

Министерката за финансии Гордана Димитриеска-Кочоска ја нагласи и приходната страна. Царината има важна улога во полнењето на државниот буџет.

Во првите осум месеци биле наплатени речиси 10,5 милијарди денари од увозни давачки. Тоа е раст од 9,7 отсто во споредба со истиот период лани.

Дигитализацијата треба да ги скрати процедурите

Вториот дел од инвестицијата е помалку видлив, но важен. Се воведуваат нова информатичка инфраструктура и дигитални царински системи.

Еден систем ќе ги регистрира и идентификува економските оператори. Друг ќе управува со идентитетите на корисниците и дигиталниот потпис.

Со нив треба да се намалат административните чекори. Компаниите ќе можат електронски да управуваат и со своите овластувања.

Системите се дел од повеќегодишниот царински план на ЕУ. Таква инфраструктура се очекува да развиваат и земјите кандидати за членство.