ВРХОВЕН ОБЈАСНИ ЗОШТО ГИ УКИНА ПРЕСУДИТЕ ЗА ЈАКИМОВСКИ Предметот оди на повторно судење

Врховниот суд го објави образложението за одлуката со која ги укина пресудите против поранешниот градоначалник на Општина Карпош Стевче Јакимовски. Клучната причина е што пониските судови не утврдиле каков бил правниот статус на објектот за кој Јакимовски беше осуден за бесправно градење.

„Во конкретниот случај не е точно утврден видот на деловниот објект, па врз основа на тоа да се даде одговор дали за поставениот монтажен објект било потребно одобрение за градба“, се наведува во одлуката на Врховниот суд.

Судот оценил дека требало јасно да бидат утврдени типот и правниот статус на објектот, земајќи ги предвид неговите градежно-технички карактеристики, материјалите и намената. Бидејќи тоа не било направено со потребната сигурност, Врховниот суд утврдил повреда на Кривичниот законик.

Тоа, сепак, не значи дека Јакимовски е ослободен од обвинението. Врховниот суд ги укина претходните пресуди и го врати предметот во Основниот кривичен суд Скопје на повторно постапување и одлучување. Одлуката била донесена на 9 септември, по барање за вонредно преиспитување на правосилната пресуда.

Со одлуката се укинати пресудата на Основниот кривичен суд Скопје од 23 април 2025 година и пресудата на Апелациониот суд Скопје од 15 мај 2026 година.

Кривичниот суд соопшти дека ќе ја извести затворската установа дека Јакимовски се ослободува од понатамошното извршување на претходно изречената санкција. Тој веќе се наоѓа на прекин на издржувањето на казната поради здравствени причини, па по укинувањето на пресудите нема да треба да се врати во затвор за продолжување на таа казна.

Јакимовски првостепено беше осуден на единствена казна од три години и шест месеци затвор за бесправно градење и злоупотреба на службената положба и овластување. Апелација потоа ја потврди едногодишната казна за бесправно градење, додека делот за злоупотреба на службената положба го врати на повторно судење.