ВО НОВАТА ГОДИНА ПОЛЕСНО ЌЕ СЕ ПРЕЖИВУВА Лековите против ковид-19 ќе спасат многу животи?

Новите лекови против ковид-19 во 2022 година значително ќе ги подобрат шансите за преживување на тешко болните пациенти заразени со новиот коронавирус, изјави директорот на СЗО за Европа Ханс Клуге.

– Јас сум ентузијаст за новите антивирусни лекови кои најверојатно ќе се појават на пазарот во 2022 година и кои значително ќе ги зголемат шансите за преживување на пациентите примени во болница со тешка форма на Ковид-19 – рече тој.

Клуге нагласи дека вакцините од следната генерација ќе бидат поефикасни против новите варијанти на коронавирус, што ќе се појават низ целиот свет.

– Не можам да ја предвидам иднината. Но, треба да се забележи дека сегашните вакцини се првата генерација вакцини за ковид-19. Идните вакцини ќе бидат поусовршени и приспособени на новите варијанти, што ќе ги направи поефикасни. Тоа е процес сличен на оној што веќе се случува со вакцините против грип, кои речиси секоја година се приспособуваат на новите соеви – објасни тој.