СПОРЕД КОЈ ЗАКОН СЕ ВЛЕЧАТ ЛУЃЕ ЗА УШИ? Беџети и Мицкоски влегоа во расправија

Пратеникот на ДУИ, Блерим Беџети, упати пратеничко прашање до премиерот Христијан Мицкоски, обвинувајќи го за мешање во работата на правосудните институции.

Поводот за неговата реакција беше неодамнешната прес-конференција на Мицкоски во Владата, на која, според Беџети, премиерот давал обвинителски квалификации за случајот со трагичниот настан во еден ноќен клуб.

Во одговорот до пратеникот, Мицкоски го негираше обвинувањето, нагласувајќи дека никогаш не дал изјава со која би се осудувал некој предвреме.

– Јас никогаш не се изразив како што вие велите, било кого да осудам предвреме. Иако ние како политичка партија знаеме што значи да се биде жртва на такви квалификации – сме го почувствувале тоа. За нас важи правилото: не им го прави на другите тоа што не сакаш да ти го прават тебе – рече Мицкоски од собраниската говорница.

Премиерот додаде дека Јавното обвинителство е институцијата која ја води истрагата и само таа може да утврди дали некое лице е осомничено.

Тој прецизира дека неговите изјави биле внимателни и со „триста огради“, а целта била да се укаже на можноста за постоење фалсификувана документација поврзана со клубот каде се случи трагедијата.

– Точно е дека јавно кажав, со триста огради, дека може да влијаам на истрагата ако кажам дека постои фалсификуван документ – лиценца. Потоа се провери архивскиот број и беше утврдено дека под тој број се води друг документ. Лиценците ги издава Министерството за економија, а од 2008 година па наваму министри биле предлози на ДУИ. Клубот започнува со работа во 2012 година, токму кога министерот бил од ДУИ – посочи Мицкоски, прашувајќи реторички кој ги потпишувал тие документи.

Тој додаде дека е најдобро да се почека завршувањето на истрагата, по што ќе се утврди дали имало селективен пристап.

– Можеби јас ќе бидам осомничен, можеби министерот Тошковски, можеби некој трет. Тогаш ќе направиме заклучок дали се работи за селективна правда – истакна премиерот.

Пратеникот Беџети повторно се јави за збор, потсетувајќи на претходна изјава на Мицкоски за „влечење за уши“, иронично прашувајќи кој закон му дозволува на премиерот да спроведува правда на таков начин.

– Ооо… тогаш важи вашиот закон во оваа држава, не законите и Уставот. Се надевам дека целата јавност го слуша овој одговор – дека од законот на премиерот Христијан Мицкоски, можат да се влечат луѓе за уши – рече Беџети, алудирајќи на дофрлања во салата и изјави од страна на Мицкоски.Set featured image