Реалистични портрети, сликани со маслени бои на платно и дрво, но и уметнички дела на ѕидови, маици, еспадрили и патики. Сања Јовановска утре, 17 октомври, во 20 часот, во Бифе Тафталиџе ќе ја отвори својата прва самостојна изложба. Сања Јовановска, дипломирана ликовна уметница на Факултетот за ликовни уметности во Скопје, отсек графика, под менторство на професорот Димитар Малиданов, досега учествувала на повеќе групни изложби, но ова е нејзиното прво самостојно претставување пред публиката. Нејзиниот израз го одликува реализмот, особено во портретите, во кои прецизноста и вниманието кон деталите се толку впечатливи што гледачите често помислуваат дека пред себе имаат фотографија, а не слика. Покрај класичните подлоги, платното и дрвото, Јовановска ја пренесува својата уметност и на необични површини – од ѕидови до облека и обувки, претворајќи ги маиците, еспадрилите и патиките во мали уметнички дела. Првата самостојна изложба е можност публиката одблизу да го запознае нејзиниот творечки свет и разновидноста на нејзината работа. Изложбата ќе биде отворена утре во 20 часот во Бифе Тафталиџе.