ЛЕКЦИИТЕ ОД МОСКВА КАКО БУМЕРАНГ Ѝ СЕ ВРАТИЈА НА ЕВРОПА Ле Пен ја спореди пресудата против неа со прогонот на опозиционери во Русија
Кога имате дискредитирање до таа мера што на лидерот на опозицијата, фаворитот во анкетите, не му е дозволено да се кандидира, целиот свет се прашува што се случува во Франција, вели лидерката на француската десничарска партија Национален Собир.
Русија ѝ ги врати лекциите за демократија на Европа како бумеранг, изјави лидерката на француската десничарска партија Национален собир Марин Ле Пен.
– Ставете се на местото на Кремљ, на кој му се држат лекции за демократија наутро, напладне и навечер. Сега велат: „Ќе им ја вратиме оваа лекција како бумеранг“. За Кремљ тоа е очигледно начин да го доведе (францускиот претседател Емануел) Макрон во отежната позиција. На истиот начин, ако утре ѝ даваме лекции на Турција, која го затвори главниот противник на (турскиот претседател Реџеп Таип) Ердоган, тие ќе нè гледаат со потсмев, како и многу други земји, што е страшно – изјави Ле Пен.
Таа вели и дека Франција треба да ја игра својата улога во светот.
– Кога имате дискредитирање до таа мера што на лидерот на опозицијата, фаворитот во анкетите, не му е дозволено да се кандидира, целито свет се прашува што се случува во Франција – додава контроверзната десничарка.
Ле Пен истакна дека планира да се обрати до Уставниот суд и Европскиот суд за човекови права за да ја оспори пресудата со која ѝ се забранува да учествува на избори.
– Се надеваме дека овие иницијативи кои ги почнуваме ќе ни дадат прилика во нормални услови да ги одржиме претседателските избори. Мислам дека во политиката никогаш не треба да се вели никогаш. Но да, мислам дека нивниот збор ќе биде последен. Освен ако не бидам избрана – кажа таа за Паризиен на прашањето дали намерава да се кандидира за претседател по 2027 година.
Ле Пен е осудена на затворска и парична казна и цели пет години ќе биде елиминирана од политичката сцена поради злоупотреба на средства во Европскиот парламент.
По пресудата таа порача дека нема да дозволи на овој начин да ја елиминираат и дека е „неосновано осуден фаворитот на претседателските избори“.
Портпаролот на Кремљ Дмитриј Песков, коментирајќи ја пресудата на Лепен, изјави дека сè повеќе европски престолнини почнуваат да ги газат демократските норми.