ЗОШТО МУ БИЛ ЗАБРАНЕТ ПРЕЛЕТ НАД БиХ НА СРПСКИОТ ПРЕМИЕР? По реакциите на Додик, се јави Конаковиќ

Српскиот премиер Ѓуро Мацут не добил дозвола со авион да прелета над Босна и Херцеговина на пат кон Бања Лука. Одлуката веднаш предизвика жестока реакција од Милорад Додик, а потоа се јави и министерот за надворешни работи на БиХ, Елмедин Конаковиќ.

Неговото објаснување е многу поконкретно од политичката бура што ја предизвика забраната. Според Конаковиќ, барањето не било доставено во пропишаниот рок од 72 часа.

„Процедурите се познати и тие добро ги знаат. Тие добро знаат дека рокот за испраќање барање е 72 часа однапред, а тоа не го почитуваа“, напиша Конаковиќ на Икс.

Тој случајот го претстави и како прашање на односот на Србија кон институциите на БиХ.

„Кога ќе почнат да ја почитуваат државата и институциите, тогаш и ние ќе ги почитуваме“, порача Конаковиќ.

Лидерот на босанските Срби Додик претходно излезе со сосема поинакво толкување. Тој забраната ја нарече „политичко лудило и изливи на омраза“ и тврдеше дека за таква одлука нема уставна основа.

Додик оцени дека со одлуката се исклучува еден од конститутивните народи во БиХ. Тој порача и дека спорот нема да го спречи одбележувањето на Денот на српското единство, слободата и националното знаме.

Ниту забранетиот прелет, според најавата, нема да го спречи Мацут да стигне во Бања Лука.

– Ако не можам да одам со авион, ќе одам со автомобил – изјави српскиот премиер.

Мацут треба да се сретне со премиерот на Република Српска, Саво Миниќ, а на средбата се најавени и членови на двете влади. Предвидено е српскиот премиер да се обрати и на церемонијата во Бања Лука.

Денот на српското единство, слободата и националното знаме Србија и Република Српска го одбележуваат заеднички од 2020 година. Празникот се одбележува на 15 септември, во спомен на пробивот на Солунскиот фронт во 1918 година.