МЕРЦ СЕ СПРЕМА ЗА ИЗБОРЕН НЕУСПЕХ, ГО ОТКАЖА ЛЕТОТ Неговата ЦДУ во една покраина падна на само 6%

Германскиот канцелар Фридрих Мерц го расчисти распоредот и го откажа планираното патување во Њујорк во момент кога две нови покраински изборни битки го зголемуваат притисокот врз неговото раководство. Наместо на Генералното собрание на ОН, денес вниманието му е насочено кон резултатите од Берлин и Мекленбург-Западна Померанија.

Од германската влада беше соопштено дека неговото присуство е потребно во Берлин. ЦДУ свика и посебен состанок за да го усогласи одговорот на партијата по изборите и да покаже единство околу Мерц.

ЦДУ падна на само 6%

Најголемиот притисок доаѓа од Мекленбург-Западна Померанија. Последната анкета на Forschungsgruppe Wahlen ја става ЦДУ на само 6%, блиску до изборниот праг од 5% за влез во покраинскиот парламент. Таков резултат би бил најслаб досега за партијата во оваа покраина.

Битката за првото место таму е тесна. СПД на покраинската премиерка Мануела Швезиг има 37%, а АфД 36%. Претходните анкети покажуваа обратен распоред, со АфД на 37% и СПД на 35%.

Мерц на изборите влегува само две недели по силниот резултат на АфД во Саксонија-Анхалт. Истовремено, неговиот личен рејтинг во националните анкети падна до 14%, а во ЦДУ се отворија прашања за натамошниот курс на партијата.

И Берлин носи нов тест

Ниту Берлин не му носи мир на ЦДУ. Последната анкета ја става Левица на 22%, ЦДУ на 20%, АфД на 18%, Зелените на 15%, а СПД на 12%. Станбената криза и високите кирии се меѓу главните теми на изборите во германската престолнина.

Покраинските избори сами по себе не одлучуваат кој ќе биде германски канцелар.

Мерц веќе порача дека има намера да го заврши целиот четиригодишен мандат и одби својата политичка иднина директно да ја врзе за резултатот од поединечни покраински избори.