ЕВРОПСКАТА УНИЈА УСВОИ НОВ ПАКЕТ САНКЦИИ КОН РУСИЈА Грција обезбеди исклучок за себе

Европската Унија се согласи да воведе нов пакет санкции против Русија, по хаотичните преговори кои се закануваа да го доведат во прашање целиот пакет. Грција, чие вето досега го спречуваше постигнувањето договор, обезбеди изземање со кое ќе може и понатаму да транспортира руски течен природен гас (LNG) до клиенти надвор од ЕУ во догледна иднина.

Ова е 21 пакет санкции воведен од февруари 2022 година.

Договорот, постигнат во четвртокот од страна на амбасадорите, е значително ублажен и отвора сериозни прашања за влијанието на националните економски интереси во долгогодишната кампања за ограничување на способноста на Москва да ја финансира инвазијата на Украина.

Договорот постигнат од амбасадорите го замрзнува ограничувањето на цената на 44 долари за барел во период од 12 месеци, со што се отстранува еден извор на неизвесност во време кога повторно започнуваат непријателствата меѓу САД и Иран.

Дополнително, со пакетот се ставаат на црната листа 30 бродови од таканаречената „флота во сенка“, која Русија ја користи за да го заобиколи ограничувањето на цената и, во одредени случаи, за спроведување операции на хибридно војување. На повеќе од 600 вакви дотраени бродови им е забранет пристап до пристаништата и услугите во ЕУ.

Пакетот исто така ги таргетира руските банки, крипто-платформите и платформите за трговија со нафта, различни метали, како и повеќе од 250 лица и компании обвинети дека ја поддржуваат инвазијата на Украина, шират пропаганда во корист на војната и овозможуваат заобиколување на санкциите.

Договорот постигнат во четвртокот става крај на неколкунеделните интензивни преговори, во кои земјите членки решително се обидуваа да ги отстранат елементите што ги сметаа за непогодни.

Обидот за ограничување на увозот на руски рибни производи, особено бакалар и полок, беше напуштен откако Португалија и Германија изразија резерви.

Во меѓувреме, Бугарија успеа да отстрани две имиња од конечната листа: патријархот Кирил, поглаварот на Руската православна црква, и Вагит Алекперов, милијардерот основач на „Лукоил“.

Исто така, Австрија извојува политичка победа откако земјите членки се согласија да го разгледаат нејзиното барање за укинување на санкциите против „Rasperia“, инвестициска компанија ставена на црната листа, со цел да се надомести загубата од 2,1 милијарди евра што ја претрпе „Raiffeisen Bank International“ во Русија.

За разлика од минатата година, кога барањето беше целосно отфрлено, амбасадорите овојпат покажаа поголемо разбирање и ѝ ветија на Виена дека во подоцнежна фаза ќе најдат решение.