ПАРАДА НА ГОРДОСТА ВО СКОПЈЕ Посебен режим на сообраќај во сабота попладне
Парадата на гордоста претставува протестен марш за човекови права, еднаквост и достоинствен живот на ЛГБТИК+ луѓето во Македонија.
Парада на гордоста Скопје Прајд 2026 ќе се одржи утре, сабота (20 јуни) под слоганот „Сите нека знаат“.
Парадата на гордоста претставува протестен марш за човекови права, еднаквост и достоинствен живот на ЛГБТИК+ луѓето во Македонија. Годинава маршот ќе се одржи во услови на засилени општествени и политички предизвици, со порака за видливост, солидарност и отпор кон дискриминацијата.
Собирот на учесниците ќе започне во 18 часот кај Фонтаната во Градски парк, а протестниот марш ќе започне во 19 часот.
Поради тоа ќе има посебен режим на сообраќај во Скопје.
Единицата за безбедност на патниот сообраќај при СВР Скопје ќе преземе мерки за посебен режим на сообраќај за безбедно и непречено одвивање на сообраќајот.
Настанот ќе почне со траса на движење од пред Фонтана Лотус-Градски парк, во продолжение по булеварот Илинден, лево по улицата Франклин Рузвелт, лево по булеварот Партизански Одреди, десно по улицата Васил Главинов, лево продолжува по улицата Димитрие Чуповски и завршува парк Жена Борец на улицата 11 Октомври.
СВР Скопје апелира до граѓаните да ги почитуваат наредбите што ќе ги издаваат полициските службеници по сообраќајниците опфатени со посебниот режим на сообраќај.