МАКЕДОНИЈА ДОБИВА СВОЈ ВЕЈН РУНИ ВО НАПАДОТ Фудбалер на Филаделфија сака да игра за репрезентацијата

Единаесет голови и две асистенции во само 17 натпревари во МЛС – тоа е визит-картата со која Милан Илоски силно чука на вратата на македонската репрезентација. Центарфорот на Филаделфија јунион, покрај американското, го поседува и македонското државјанство, а самиот вели дека корените никогаш не ги заборавил.

– Семејството од страна на татко ми е целосно македонско. Растев со баба ми и дедо ми кои ми зборуваа на македонски. Иако јазикот не го владеам течно, добро го разбирам и секогаш со нив сум комуницирал на тој начин. Гордо е чувството да носиш македонска крв. Тоа е дел од мојот идентитет и начин на живот – изјави Илоски за новинарот Филип Мишов.

Илоски признава дека идејата да игра за Македонија му изгледа примамливо:

– Имав неколку разговори со играчи од репрезентацијата. Би била голема чест да се облече националниот дрес. Секако, тоа зависи и од околностите и другите можности пред мене, но отворен сум. За мене тоа би бил голем и позитивен чекор во кариерата.

Фудбалерот роден во Калифорнија има 26 години и веќе се движи кон бројките на својот идол Вејн Руни, кој постигна 23 гола во МЛС. Интересно е што Илоски веќе остави белег со два рекорда: минатата сезона го постигна првиот хет-трик за Сан Диего, а на истата средба за само 12 минути постигна четири гола против Ванкувер – најбрз „покер“ во историјата на лигата.

Најновото поглавје го пишува во дресот на Филаделфија јунион. Пред само три дена го запиша првиот гол и првата асистенција за новиот клуб, кој го откупи неговиот договор од данскиот Нордсјиланд. Илоски сега е во подем, а Македонија можеби е следната голема сцена на која ќе се претстави.