ЈП ВОДОВОД И КАНАЛИЗАЦИЈА СЕ ОГЛАСИ ЗА ИНЦИДЕНТОТ Претседателот на УО предизвикува инциденти за неговата сопруга да остане „недопирлива“ за никаква одговорност
Од ЈП Водовод и канализација наведуваат дека во измнинатиот период се соочуваат со серија инциденти за кои како иницијатор го посочуваат претседателот на УО, Идриз Орана.
ЈП Водовод и канализација – Скопје се огласи со соопштение за денешниот инцидент во кој беа вклучени раководните структури на претпријатието во кое се посочува дека денешниот инцидент бил еден во серијата инциденти со кои се соочуваат во изминатиот период.
„ЈП Водовод и канализација – Скопје, во текот на денешниот ден, повторно се соочи со непријатни ситуации и настани наметнати од страна на претседателот на Управниот Одбор на претпријатието, Идриз Орана.
Имено, денешниот инцидент е засега последен од серијата инциденти со кои менаџментот, но и вработените на претпријатието се соочуваат во изминатиот период. Овој тип на инциденти создаваат непријатна и нездрава средина за нормално фунционирање на вработените, а за жал во некои од нив, покрај вербалните има и физички навреди, закани и притисоци“ – се наведува во соопштението од ЈП Водовод и канализација – Скопје
Од јавното претпријатие информираат и дека сите настани и инциденти се пријавени во МВР.
„Во текот на денешниот ден, претседателот на УО на ЈП Водовод и канализација – Скопје, повторно иницираше инцидент, одбивајќи да го одржи состанокот на одредената локација предвидена за истото, на петтиот кат, каде како и за сите состаноци истата беше наместена и организирана соодветно. Наместо таму, на негова иницијатива и притисок од негова страна, членовите на УО кои веќе беа седнати на 5-от кат во Салата за состаноци по телефонски повик од негова страна се симнуваат долу за да предизвикаат инцидент со обезбедувањето каде меѓу другото, претседателот на УО, Идриз Орана се обиде да иницира и физички судир со обезбедувањето.
Обезбедувањето на ЈП Водовод и канализација – Скопје, на ниво на својата задача, го спречи развојот на немилите настани, на мирен и достоинствен начин, со цел задржување на редот и безбедноста во претпријатието.
Менаџментот на ЈП Водовод и канализација – Скопје, испраќа јавно порака до претседателот на УО, Идриз Орана, да престане со притисоците врз членовите, вработените, со иницирање на инциденти, како и со обвинувања за нефункционалноста на менаџментот само за да ја исполни својата цел – неговата сопруга да продолжи со континуирано повеќегодишно продолжување на боледувањето и истата да биде „недопирлива“ за проверка, казна, дисциплинска и друга одговорност.
Правилата, прописите и протоколите за работа мора да се почитуваат и да важат за секого, без разлика дали е функционер, претседател на управен одбор или не“ – стои во соопштението од скопски Водовод.