СРПСКАТА ЦЕНТРАЛНА БАНКА КУПИ 16,3 ТОНИ ЗЛАТО ОД РУДНИКОТ БОР Кинеската компанија која управува со рудникот заработи повеќе од 400 милиони евра

Српската Народната банка лани купила рекордни 4,3 тони злато од кинеската компанија „Србија Зиџин Копер“. Станува збор за околу 344 прачки, од кои секоја тежи малку повеќе од 12 килограми, со што целото минатогодишно производство на злато од рудникот во Бор беше продадено на еден купувач.

Рудникот за злато и бакар во Бор е во мнозинска кинеска сопственост од крајот на 2018 година, кога кинеската компанија „Зиџин Мајнинг“ преку рекапитализација стекна 63% од акциите во поранешната државна компанија РТБ Бор.

Според српските закони, компанијата прво мора да го понуди целото ископано злато за купување на Народната банка на Србија. НБС, како што е наведено, никогаш не ја отфрлила оваа можност. Во случај централната банка да го одбие купувањето, „Зиџин“ би можела да побара дозвола за извоз.

Според „Форбс Словенија“, откако го презеде рудникот во 2018 година, НБС купи вкупно 16,3 тони злато од кинеската компанија.

Само од продажба на злато, во 2025 година, Србија Зиџин Копер оствари приход од околу 48,4 милијарди динари, што е приближно 400 милиони евра. Вкупните приходи на компанијата, кои вклучуваат продажба на бакар и сребро, изнесуваа околу 227,6 милијарди динари, при што најголемиот дел, 173,4 милијарди динари, отпаѓа на бакар.

Врз основа на остварените приходи, може да се процени дека српската централна банка платила во просек 3.000 евра за унца злато (31,1 грам). Цената на унца на светските берзи во текот на 2025 година се движеше од 2.500 до 3.700 евра.

Народната банка на Србија купува злато во домашна валута, динари, со што директно ги зголемува своите девизни резерви. Покрај купувањата на домашниот пазар, НБС стекна и дел од своите резерви на злато, вкупно околу 17 тони, на меѓународниот пазар.

Благодарение на тие купувања, резервите на злато на Србија достигнаа 53,7 тони во март оваа година, што е повеќе од трикратно зголемување во споредба со 2012 година, кога изнесуваа нешто помалку од 15 тони. Вредноста на овие резерви, според тековните пазарни цени, се проценува на околу 6,9 милијарди евра.

Во споредба со 2012 година, вредноста се зголеми за дури 11 пати, за што, покрај зголемувањето на количината, значително придонесе и порастот на цената на златото на светскиот пазар. НБС објави дека имаат намера да продолжат да купуваат злато на домашниот пазар во иднина.