Нов, брз тест за корона, резултати за 15 минути, најави СЗО
Се очекува во следните шест месеци да бидат произведени 120 милиони вакви тестови, а првиот човек на СЗО го нарече тоа „голема пресвртница“.
Тестот што точно може да ја дијагностицира инфекцијата со коронавирус, треба драматично да го забрза и зголеми опсегот на тестирање во земјите со низок и среден приход, објави Светската здравствена организација (СЗО).
Новиот тест треба да чини околу пет американски долари и може целосно да го трансформира процесот на следење на ширењето на ковид-19 во помалку богатите земји, кои страдаат од недостаток на здравствени работници и лаборатории, пренесува Би-Би-Си.
Се очекува во следните шест месеци да бидат произведени 120 милиони вакви тестови, а првиот човек на СЗО го нарече тоа „голема пресвртница“.
Експертите предупредуваат дека во некои земји со високи стапки на инфекција, вклучително и Мексико и Индија, нискиот опсег на тестирање го маскира вистинскиот степен на ширењето на коронавирусот.
Новиот тест треба да биде „лесно пренослив и лесен за употреба“, а резултатите треба да бидат готови за 15-30 минути, наместо за неколку дена, објави на прес-конференција првиот човек на Светската здравствена организација, Тедрос Аданом Гебреизус.
Две фармацевтски компании, Abbott и SD Biosensor, се согласија со фондацијата на филантропот и основач на Мајкрософт, Бил Гејтс, да произведат 120 милиони тестови, изјави шефот на СЗО.
Договорот се очекува да опфати 133 земји, вклучително и многу јужноамерикански земји кои во моментов се најпогодени во однос на стапката на инфекции, како и смртноста.
– Ова ќе биде клучно за да им се помогне на нивните капацитети за тестирање, особено во тешко достапните области, кои немаат доволно лаборатории или доволно здравствени работници обучени да спроведат тестирање – рече Тедрос.