КАМИОНЏИИТЕ СО УЛТИМАТУМ ДО БРИСЕЛ Превозниците предупредуваат на протести и блокади по 10 август

Превозниците од Македонија, Србија, Црна Гора и Босна и Херцеговина денеска официјално ќе испратат писмо до Европската комисија, во кое бараат до 10 август да се понуди прифатливо решение за проблемот со ограничувањата за престој на професионалните возачи во Шенген зоната.

Рокот е поврзан со истекувањето на 90-те дена од моментот кога на возачите им започнаа да се применуваат ограничувањата.

Одлуката беше соопштена на прес-конференција по заеднички состанок на претставниците на деловните здруженија од четирите земји, од страна на претседателот на Меѓународната асоцијација за транспортен бизнис, Неџо Мандиќ.

Тој изјави дека е направена анализа на моменталната состојба и дека иако проблемите сè уште постојат, тие не се толку изразени како во претходниот период.

– Се согласивме дека во овој момент нема да преземеме никакви конкретни активности, но дека од денешниот состанок ќе испратиме писмо до Европската комисија со рок до 10 август да се најде прифатливо, ако не конечно, тогаш барем привремено решение за нашите возачи и транспортни компании да можат да работат без пречки – рече Мандиќ.

Тој додаде дека целта е да се избегнат протести и блокади, кои, како што вели, би им наштетиле на сите страни.

– Сакаме да избегнеме протести и блокади, ова им штети на сите – нагласи тој.

Мандиќ најави дека претставниците на здружението повторно ќе се состанат околу 10 август доколку дотогаш не добијат прифатлив одговор од Брисел.

– Во тој случај, ќе објавиме нови конкретни мерки за забрзување на решавањето на овој проблем – рече тој, без да прецизира какви мерки би можеле да се преземат.

Според него, транспортните здруженија во изминатите три години испратиле неколку писма до Европската комисија, а денешниот состанок претставува потврда за единството и продолжување на борбата за решавање на проблемот.

Мандиќ нагласи дека превозниците сакаат да избегнат протести и блокади на границите, бидејќи таквите мерки би им наштетиле не само на компаниите, туку и на економиите во регионот и на европските партнери.

– Не ни одговара да не возиме, бидејќи тогаш не заработуваме, но тоа им штети и на економиите на нашите земји, како и на европската економија, која е поврзана со нашата. Затоа апелираме до оние што донесуваат одлуки, но и до деловните партнери во Европа, да помогнат во изнаоѓање решение – истакна тој.

Тој додаде дека шпедитерите од регионот едногласно усвоиле декларација на неодамнешниот конгрес во Букурешт, со која ги поддржуваат барањата на превозниците.

Мандиќ потсети дека сегашното правило според кое државјани на трети земји можат да престојуваат во Шенген зоната максимум 90 дена во период од 180 дена не е прилагодено на професионалните возачи.

Како што објасни, анализите покажуваат дека за непречено работење на меѓународниот транспорт на возачите им се потребни околу 130 работни дена во рамки на 180 дена.

Тој оцени дека професионалните возачи не можат да се изедначуваат со туристи, бидејќи нивното движење низ Шенген зоната е исклучиво дел од работните обврски.

– Професионалните возачи поголемиот дел од времето го поминуваат во камион или на задолжителни паузи. Тие не престојуваат како туристи, туку ја извршуваат својата работа. Затоа сметаме дека сегашниот систем на пресметување на деновите не е реален и сериозно го отежнува работењето на транспортните компании – рече тој.

Тој додаде дека проблемот дополнително се продлабочил по проширувањето на Шенген зоната со Хрватска, Романија и Бугарија, со што земјите од регионот се речиси целосно опкружени со членки на Шенген.

– Со оглед дека сега има 33 земји во Шенген, транзитот практично се третира како престој. Ако возиме кон земји од ЕУ или кон Обединетото Кралство, ние сме постојано во Шенген зоната. Не престојуваме, туку работиме – или сме во возилото или на паркинг за одмор, но деновите се трошат. Тоа е неправедно и не одговара на реалноста на професијата – заклучи Мандиќ.