АКО Е ОТКАЖАН ЛЕТОТ ПОРАДИ ВИСОКАТА ЦЕНА НА ГОРИВОТО, ДОБИВАТЕ ОШТЕТА Авиокомпанијата нема да плати оштета, ако летот е откажан поради недостиг на гориво

Високите цени на керозинот не можат да бидат изговор авиокомпаниите да не ги почитуваат правата на патниците и само во случај на откажан лет поради недостаток на гориво се ослободуваат од исплата на обесштетување на  патниците, информира Европската комисија (ЕК).

-Европските права на авиопревозниците продолжуваат да важат во целост. Во случај на откажување, патниците имаат право на враќање на парите, пренасочување или враќање, како и помош на аеродромот и обесштетување за откажувања во последен момент – изјави портпаролката на ЕК, Ана Каиса Итконен.

Исклучок од тоа, рече таа, е откажување на лет поради недостиг на гориво.

-Затоа, авиокомпаниите се ослободени од плаќање обесштетување само ако можат да докажат дека откажувањето е предизвикано од вонредни околности, како што е недостаток на гориво. Ние не ги сметаме високите цени на горивата за вонредна околност – рече таа.

Европската комисија денеска усвои насоки за секторот за транспорт и туризам на ЕУ, поради глобалните прекини во снабдувањето со гориво и затворањето на одредени воздушни и бродски рути поврзани со кризата на Блискиот Исток.

Насоките се фокусираат на воздухопловството, особено на влијанието на потенцијалниот недостиг на керозин доколку конфликтот продолжи.

Во упатствата се наведува дека не е дозволено ретроактивно зголемување на цените на продадените билети преку дополнителни такси, како што се доплати за гориво.

Што се однесува до пакет аранжманите, директивата им дозволува на организаторите можност за ретроактивно зголемување на цените, доколку тоа е наведено во договорот и само под одредени околности.

Агенцијата за безбедност на воздухопловството на Европската унија (EASA) издаде билтен за безбедност со информации за снабдувањето со гориво и безбедното користење на горивото за воздухопловство Jet A во Европа.

Ситуацијата на Блискиот Исток влијае на снабдувањето со гориво Jet A-1, кое традиционално се користи во Европа, и гориво Jet A во Северна Америка.

Главната разлика е во точката на замрзнување – за Jet A-1 е минус 47 степени Целзиусови, поради што е посоодветен за долги летови и летови во постудени клими. Jet A има повисока точка на замрзнување, максимум минус 40 степени.

EASA отвори можност за користење на гориво Jet A во Европа, кое се произведува во Соединетите Држави, кое не се користи во Европа од технички причини.