СЕСТРАТА НА РОНАЛДО НАВЕСТИ ДЕКА НЕ Е СÈ КАЖАНО Можеби ќе се дознае што стои зад повлекувањето на асот

Загадочна порака од сестрата на Кристијано Роналдо отвори нови прашања за неговото повлекување од португалската репрезентација. Катија Авеиро на Инстаграм напиша дека има многу што да каже, но дека времето ќе покаже дали постојат работи што допрва треба да се разјаснат. Нејзината објава следуваше откако 41-годишниот фудбалер официјално потврди дека ја завршува репрезентативната кариера по 23 години.

„Би можела да кажам многу, но времето сигурно ќе покаже. Ако има уште нешто на што треба да се одговори, можеби утре работите ќе станат појасни. Дотогаш, брате мој, можам да ти кажам само едно: ти си голем, вистински џин и легенда“, напиша Катија.

Токму споменувањето на неодговорените прашања привлече најголемо внимание. Нејзините зборови поттикнаа шпекулации дека зад одлуката на Роналдо можеби постојат околности што не ѝ се познати на јавноста.

Сепак, Катија не откри на што конкретно мисли, ниту посочи дека нејзиниот брат бил принуден да ја напушти репрезентацијата.

Остатокот од објавата беше посветен на долгогодишната кариера на Роналдо и на неговиот придонес за португалскиот фудбал.

„Денес светот се простува од тебе во португалската репрезентација. Јас, како твоја сестра, се навраќам на сè низ што си поминал и чувствувам гордост која едвај собира во моето срце. Знам какви битки си водел, колку си ѝ дал на нашата земја и што си изградил во текот на својата кариера“, напиша таа.

Катија нагласи дека нејзиниот брат не ја променил само сопствената судбина, туку оставил траен белег и врз Португалија. Според неа, крајот на репрезентативната кариера истовремено отвора можност за ново животно поглавје.

На објавата приложила и фотографија со посебна семејна вредност, потсетувајќи дека зад светската фудбалска ѕвезда стои човек кого таа го познава уште од детството.

„Оваа фотографија можеби не е со најдобар квалитет, но за мене има огромна вредност бидејќи чува дел од нашата историја. Ме потсетува дека, пред да станеш Кристијано Роналдо кого целиот свет го обожава, ти беше и засекогаш ќе бидеш мој брат и мое дете. Те сакам и бескрајно се гордеам со тебе“, напиша Катија.

Роналдо ја завршува репрезентативната кариера по 23 години, со рекордни 234 настапи и 146 постигнати голови за Португалија.

Со националниот тим го освои Европското првенство во 2016 година и двапати триумфираше во Лигата на нации, во 2019 и во 2025 година.