📽️ „ИТНАТА ПОМОШ Е ПРЕПОЛНА, А ВОДИТЕ ЉУБОВ, ОТПУШТЕНИ СТЕ!“ Градоначалник им се развикал на двајца лекари, биле заклучени во соба, а пациенти ги чекале
Градоначалникот на Бареирос, Карлињос да Педреира, се расправа со двајца лекари во просторија за одмор во општинската болница, за време на ненајавена инспекција.
Градоначалникот на бразилскиот град Бареирос, Карлињос да Педреира, предизвика бурни реакции откако за време на ненајавена посета на општинската болница влегол во просторија за одмор и им се развикал на двајца лекари, обвинувајќи ги дека спијат и се забавуваат додека пациентите чекаат медицинска помош. Снимката од расправијата се прошири на социјалните мрежи, но здравствените организации реагираа дека обвинувањата за интимен однос не се докажани и дека лекарите биле јавно понижени.
Инцидентот се случил во вечерните часови на 4 ноември, во Општинската болница „Жаилтон Месијас де Соуза Албукерке“ во Бареирос, во бразилската држава Пернамбуко. Според локалните медиуми, градоначалникот дошол ненајавено по поплаки од граѓани за долгото чекање во итната медицинска помош.
При пребарување на објектот, градоначалникот Да Педреира влегол во просторијата наменета за одмор на персоналот, каде ги затекнал лекарот и неговата колешка. Целата ситуација и жолчната расправија беа снимени на видео, кое веднаш стана вирално на социјалните мрежи.
View this post on Instagram
На видеоснимката јасно се гледа видно револтираниот градоначалник како вика и директно ги соочува лекарите.
– Народот надвор умира во чекалната, децата плачат, а вие тука сте се заклучиле во соба и водите љубов на дежурство! Ова е срамота и непочит кон граѓаните на Бареирос! – викал градоначалникот додека гестикулирал кон креветите во собата за одмор.
Лекарите се обиделе да се оправдаат дека биле на законска пауза за одмор и дека ништо недозволено не се случувало, но Да Педреира веднаш им наредил да ја напуштат болницата.
– Не сакам да слушнам никакви изговори! Веднаш земете си ги работите и надвор од мојата болница! Вие повеќе не работите тука, отпуштени сте. Нема да дозволам да ги трошите парите на даночните обврзници додека ги занемарувате пациентите – рекол тој.
Градоначалникот во еден момент ги повикал и присутните полициски службеници кои биле во негова придружба: „Полиција, уапсете ги веднаш! Ова е напуштање на работно место и загрозување на здравјето на граѓаните!“ (Иако полицијата не ги уапсила лекарите, тие биле принудени веднаш да ја напуштат установата).
Како директна последица од овој скандал, Општина Бареирос итно го раскина договорот со приватната организација „Жоао Пауло II“, која дотогаш менаџирала со болницата, а локалниот Секретаријат за здравство привремено го презеде раководењето со цел да се обезбеди непречена грижа за пациентите.
Лекарските организации, сепак, ја оспорија неговата постапка и побараа случајот да се испита институционално. Синдикатот на лекарите во Пернамбуко (Simepe) соопшти дека добил информации оти двајцата лекари биле на пауза за одмор по првите 12 часа од дежурството, додека трет лекар продолжил да ги прима пациентите.
Синдикатот нагласи дека видеоснимката не докажува дека лекарите правеле нешто недозволено, како што сугерирал градоначалникот. Од таму побарале официјално разјаснување на случајот и јавно извинување за обвинувањата и начинот на кој биле изложени медицинските работници.
Реагирал и Регионалниот лекарски совет на Пернамбуко (Cremepe), кој оцени дека евентуалните пропусти во работата, распоредот на дежурствата и организацијата на здравствената служба треба да се утврдуваат преку надлежните институции, а не со јавно посрамување на лекарите.
– Фактот дека се врши контрола на јавните здравствени служби не му дава право на ниту еден раководител да ги изложува лекарите на јавен линч или да ја нарушува нивната чест, углед и професионално достоинство – порача советот.
Во меѓувреме, Општина Бареирос објави дека го раскинува договорот со Здружението „Жоао Пауло II“, кое управувало со болницата, и дека привремено повторно ќе ја преземе нејзината административна и оперативна работа преку општинските здравствени служби. Во официјалното образложение, општината ја поврзала одлуката со процената на спроведувањето на договорот, но не навела дека таа е директна последица од расправијата со лекарите.