„АМАЗОН“ ВЛЕГУВА ВО МЕГАПРОЕКТОТ ВО КОЖАНИ AWS ќе го закупи дата-центарот на 15 години
Дата-центарот ќе стартува со моќност од 300 мегавати, а партнерите оставаат можност таа да порасне до 1 гигават. AWS ќе ја постави и ќе управува со ИТ-инфраструктурата, додека ДЕИ ќе ги обезбеди објектот и енергетската инфраструктура.
„Амазон“ е големото име што влегува во мегапроектот за дата-центар во близина на Кожани во Грција, за кој пред неколку недели беше познато дека грчката национална компанија за електрична енергија ДЕИ преговара со големи светски провајдери.
Грчката национална компанија и Amazon Web Services (AWS) сега потпишаа меморандум што ја утврдува рамката и главните услови за развој на проектот.
Најконкретниот нов детал е долгорочниот аранжман. По изградбата, AWS треба да го закупи дата-центарот на 15 години.
„Во почетната фаза објектот на дата-центарот ќе располага со 300 мегавати влезна електрична моќност“, соопшти ДЕИ.
Грчката национална компанија ќе ги обезбеди локацијата, објектите и придружната енергетска инфраструктура, додека AWS ќе ја инсталира и ќе управува со ИТ-инфраструктурата. Компаниите планираат да ја разгледаат и можноста капацитетот во иднина да биде зголемен до 1 гигават, зависно од пазарните услови и дополнителните конечни договори.
Проектот носи и симболичен пресврт за регионот што со децении беше врзан за лигнитот. Дата-центарот треба да користи електрична енергија од обновливи извори преку долгорочни договори меѓу AWS и ДЕИ.
„AWS купува, а ДЕИ обезбедува електрична енергија преку долгорочни договори за купопродажба на електрична енергија од обновливи извори“, се вели во написот.
Партнерството може да излезе и надвор од самиот дата-центар. ДЕИ и AWS планираат да разгледаат повеќегодишна соработка во облак-услугите и вештачката интелигенција за дигиталната трансформација на грчката компанија.
Дата-центарот е дел од планот старите лигнитни подрачја во северозападна Грција да се претворат во енергетски и технолошки центар. Грчкиот премиер Кирјакос Мицотакис пред 20 дена во Кожани најави дека токму на местото на некогашната електроцентрала во Агиос Димитриос треба да никне новата инфраструктура.
– Најмодерната инфраструктура за вештачка интелигенција во земјата ќе биде изградена овде, во вашиот регион, во Кожани – порача тогаш Мицотакис.