ИСХОДОТ ОД ИЗБОРИТЕ ВО БРВЕНИЦА НЕМА ДА ВЛИЈАЕ ВРЗ ВЛАДИНАТА КОАЛИЦИЈА Митева оцени дека ВЛЕН ја пропуштила шансата да излезе од етничката реторика

Исходот од изборите нема да влијае врз функционирањето на владината коалиција, која останува заснована на заедничка владина програма. ВЛЕН ја пропушти можноста да покаже дека се разликува од ДУИ и наместо да се дистанцира од етничката реторика, избра да постапи на спротивен начин, рече претседателката на Унијата на жени на ВМРО-ДПМНЕ, Марија Митева, во гостување на ТВ 24.

– Водевме исклучително позитивна кампања, обединувачка, излеговме со програма тоа е принципот под којшто работиме и тоа е принципот по којшто ја бараме довербата. „Една Брвеница за сите“ – за нас ќе остане повеќе од слоган, е концепт нешто на коешто и како Влада ќе продолжиме да работиме, да ја поддржуваме општината со проекти – посочи Митева.

Таа додаде дека ВМРО-ДПМНЕ не водела калкулантска политика.

– ВЛЕН излезе со сопствен кандидат уште во првиот круг. Ако прашањето е дали некако тоа се рефлектира по однос на коалицијата во рамки на Владата, можам да ви кажам не, затоа што и оваа Коалиција е владина коалиција базирана на владина програма и институциите треба да продолжат да ја спроведуваат, а тоа што ВЛЕН имаа можност да покажат дека се поразлични од ДУИ, да излезат од таа етничка реторика и навистина да покажат едно друго светло, ја пропуштија шансата и одлучија да постапуваат на спротивен начин – рече Митева.

Таа ја поздрави волјата на граѓаните, но додаде дека видовме полни авиони како им заблагодаруваат на луѓето коишто дојдоа.

– Не можеме да се бориме против демографијата, така што остануваме посветени и сигурна сум во она што го говоревме а тоа е дека со нашиот кандидат, со Стојанчо Радичевски ќе имаше навистина развој на општина Брвеница – додаде таа.