КРАЈ ЗА ДОСАДНИТЕ РЕКЛАМНИ ПОВИЦИ, КАЗНИ ДО 375.000 ЕВРА Оваа европска земја почнува пресметката со агресивниот телефонски маркетинг

Крај за досадните продажни повици. Од 11 август во Франција стапуваат во сила нови правила со кои компаниите повеќе нема да смеат да ги повикуваат граѓаните за комерцијални цели без нивна претходна и јасна согласност.

Со новиот закон се укинува досегашниот систем според кој граѓаните што не сакаа да примаат рекламни повици мораа сами да го регистрираат својот телефонски број на посебна државна листа. Потрошувачките организации со години предупредуваа дека многу кол-центри ја игнорираат оваа евиденција.

Француските власти проценуваат дека околу три четвртини од населението добива најмалку еден несакан продажен повик неделно, а кај дел од граѓаните тие се многу почести.

Според новите правила, согласноста на потрошувачот мора да биде доброволна, јасна и недвосмислена, а ќе се дава со конкретна активност, како што е означување поле во електронски или хартиен формулар.

Граѓаните ќе можат во секое време да ја повлечат согласноста, а компаниите ќе мора да докажат дека навистина ја добиле. Таа ќе важи најмногу една година, додека доказот за неа ќе мора да се чува најмалку три години.

Исклучок ќе важи за компаниите што веќе имаат договорен однос со корисникот. Тие ќе можат да го контактираат само за производи или услуги поврзани со постојниот договор.

Посебен исклучок е предвиден и за продажба на претплати за весници, списанија и други периодични изданија.

За физички лица кои ќе ги прекршат правилата се предвидени казни до 75.000 евра, додека компаниите ќе можат да бидат казнети со најмногу 375.000 евра за незаконски продажни повици.

Договорите склучени по телефонски повик што не е во согласност со новите правила автоматски ќе се сметаат за неважечки. Граѓаните ќе можат да ги пријавуваат несаканите повици преку државна платформа наменета за заштита на потрошувачите.

Властите и досега изрекувале високи казни за прекршителите. Минатата година една компанија со седиште во Ирска беше казнета со шест милиони евра затоа што контактирала лица кои претходно побарале да не добиваат продажни повици.

Новите мерки предизвикаа загриженост и во Мароко, каде што голем дел од кол-центрите работат токму за овој пазар. Според проценките, меѓу 40.000 и 50.000 работни места би можеле да бидат загрозени, бидејќи повеќе од 80 проценти од приходите во секторот доаѓаат од Франција.

Слична забрана постои и во Германија уште од 2009 година, додека во САД, Канада и Обединетото Кралство најчесто се применува систем во кој граѓаните сами ги запишуваат своите броеви на листи за забрана на рекламни повици.