ТАТКОТО НА ЕЈМИ ВАЈНХАУС ГО ИЗГУБИ СУДСКИОТ СПОР ЗА АУКЦИЈАТА Мич Вајнхаус ги обвини пријателките на пејачката дека профитирале од продажба на нејзините предмети

Мич Вајнхаус, татко на музичката ѕвезда Ејми Вајнхаус која почина пред 15 години, ја загуби битката пред Високиот суд против две нејзини пријателки, откако десетици нејзини лични предмети беа продадени на аукција.

Тој поднесе тужба против Наоми Пари и Катриона Гурлеј, обвинувајќи ги дека профитирале од предметите продадени на аукции во Соединетите Американски Држави.

Адвокатите на Вајнхаус пред судот изјавија дека двете жени „намерно ги прикриле“ продажбите и рекоа дека тој се одлучил на правна постапка бидејќи тоа му бил „единствениот начин да добие одговори“.

Заменик-судијката на Високиот суд, Сара Кларк КЦ, пресуди против и изјави дека Вајнхаус „можел да открие кои спорни предмети ги поседувале обвинетите со разумна упорност“.

– Вајнхаус е разбирливо чувствителен за секого за кого смета дека ги експлоатира спомените на Ејми … Но исто така, според мојата пресуда, тој е еднакво чувствителен во обезбедувањето семејството да продолжи да има финансиска корист – рекла судијката.

Таа исто така навела дека тој сака да доминира со луѓето и ситуациите, дека го смета за несигурен сведок и дека го поднел барањето без да се потруди да провери до кратко пред судењето дали има валидно право врз предметите за кои поднел барање.

Ејми Вајнхаус беше кантавторка и добитничка на Греми награди, најпозната по хитовите како Rehab и Back to Black. Таа почина во 2011 година на 27-годишна возраст.

Адвокатите на Пари и Гурлеј изјавија дека предметите или им биле подарени од Ејми Вајнхаус или веќе им припаѓале ним.

Судијката опишала како пејачката имала обичај да им подарува облека на своите блиски пријатели бидејќи не сакала да биде видена како носи исто парче повеќе од еднаш во јавност и имала повеќе работи отколку што некогаш би можела да носи, користи или складира.

Таа ја споменала и нејзината „извонредна дарежливост“ и заклучила дека е во согласност со нејзиниот карактер да подарува предмети и да не го менува мислењето за тоа.

Пари во изјавата прочитана во судот рекла: „Стоев покрај Ејми како пријателка, креативен партнер и нејзин костимограф. Она што го споделивме беше изградено врз доверба, лојалност и искрена љубов кон работата.

Засега, мојот фокус е на обнова на мојот живот и кариера, како и на заштита на моето име, работата што ја создадов со Ејми и нејзиното наследство“.