„НИЕ ГО ОДБРАНИВМЕ ГРЕНЛАНД, ДАНСКА ГО ОКУПИРАШЕ ПОСЛЕ ВОЈНАТА“ Следуваат американско-дански разговори за островот

Членови на администрацијата на американскиот претседател Доналд Трамп треба да се сретнат со данските претставници во среда за да разговараат за Гренланд. Средбата, која сè уште не е официјално објавена, доаѓа откако американскиот државен секретар Марко Рубио минатата недела пред Конгресот изјави дека претседателот Трамп е заинтересиран за купување на данската територија.

Белата куќа додаде дека претставниците разгледуваат широк спектар на опции за преземање на Гренланд, вклучително и користење на американската војска, за да го преземе со сила.

Иако Рубио ја минимизираше заканата од воена акција во разговор со новинарите, Трамп викендов повторно ја заостри својата реторика.

– Ако не го земеме Гренланд, Русија или Кина ќе го земат, и јас нема да дозволам тоа да се случи. Би сакал да постигнеме договор. Тоа е лесниот излез. Но, на еден или друг начин, ќе го имаме Гренланд – рече Трамп.

Американскиот сенатор Тим Кејн, кој се сретна со дански претставници минатата недела, рече дека верува оти демократите и републиканците во Конгресот ќе се обединат за да блокираат каква било воена акција насочена кон преземање на Гренланд.

Сè пожестоката реторика во последните недели дополнително ги затегна веќе затегнатите односи на Соединетите Американски Држави со нивните европски сојузници.

Неколку европски дипломати изјавија за Ен-Би-Си Њуз дека сè повеќе сфаќаат дека посветеноста на САД за одбрана на Европа и НАТО повеќе не е толку силна, како што беше во последните децении. Еден дипломат рече дека прашањето за Гренланд може да биде пресвртница.

На прашањето дали би размислил за повлекување на САД од НАТО, Трамп рече:

– Тоа би заштедило многу пари. Го сакам НАТО, но се прашувам дали би биле тука за нас ако ни требаат. Не сум сигурен дека би биле.

Републиканскиот гувернер на Луизијана, Џеф Ландри, кого Трамп минатиот месец го назначи за специјален пратеник за Гренланд вчера на платформата Икс напиша дека „историјата е важна“ и дека Соединетите Американски Држави го бранеле суверенитетот на Гренланд за време на Втората светска војна, кога Данска не можела.

„По војната, Данска повторно го окупираше, заобиколувајќи ги и игнорирајќи ги протоколите на ОН. Ова треба да биде прашање на гостопримство, а не на непријателство“, напиша Ландри.

Данскиот амбасадор во Соединетите Американски Држави, Јеспер Молер Серенсен, одговори дека „фактите се исто така важни“ и дека Гренланд е „дел од Кралството Данска со векови“. Тој истакна дека минатата недела сите 5 партии во парламентот на Гренланд повторија дека не сакаат да станат дел од САД.

„Не сакаме да бидеме Американци, не сакаме да бидеме Данци, сакаме да бидеме Гренландци“, изјавија во заедничка изјава во петокот вечерта премиерот на Гренланд, Јенс-Фредерик Нилсен и лидерите на четири партии.