КОРОНАТА ТРАЈНО ГО ОШТЕТУВА СРЦЕТО Д-р Тулевски објаснува за фиброзата, миокардитисот, аритмијата…

900Коронавирусот ги погодува речиси сите органи во телото, а експертите со месеци предупредуваат дека некои последици врз срцето или белите дробови може да бидат трајни. Доктор Игор Тулевски, специјалист по кардиологија, основач и извршен директор на Кардиолошките центри во Холандија, зборуваше подетално за срцевите заболувања и короната во тв-емисијата „150 минути“, пишува Мондо.

– Корона е многу чуден вирус што влијае на различни системи во телото. Што се однесува до срцето, знаеме дека короната влијае на белите дробови, а белите дробови и срцето се поврзани. Исто така, влијае директно на срцето, може да предизвика миокардитис, тоа е воспаление на срцевиот мускул кое може да предизвика срцева слабост и аритмија, што може да биде фатално – рече Тулевски.

Треба да се испита дали имало лузни или оштети на срцето

По прележаната корона многу луѓе се жалат на чувство на слабост, не можат да се качуваат по скалите, не можат да одат долго, веднаш го губат здивот …

– Сето тоа може да биде последица од короната, бидејќи целиот организам имал проблеми, неговата состојба треба да се подобри. Исто така, може да се јават и последиците врз срцето и другите органи. Причините за слабост можат да бидат различни. Што се однесува до срцето, многу е важно да се види дека немало фиброза, дека немало лузна на срцето, дека срцевиот мускул не бил зафатен од воспаление и дека немал тромбоза, што би значело дека некои делови, биле тоа на белите дробови или на срцето, биле погодени – продолжи тој.

Оштетувањата на срцето ќе ја пролонгираат борбата со вирусот

– Лузните на срцето остануваат. Целиот срцев мускул е еден медиум што спроведува електрична енергија и се стеснува. Кога се појавува фиброза, се формира остров кој повеќе не спроведува електрична енергија низ срцето. Тој дел повеќе не се стега, не пумпа и кога електричната енергија стигнува до островот што треба да направи лак околу него, може да предизвика проблеми со аритмија. Тоа е нешто што е хронично, останува засекогаш – предупредува д-р Тулевски.

Нема точна бројка, но оштетени се луѓе од сите возрасти

Според овој врвен кардиолог тешкиот, односно продолжен ковид ќе се јави ако короната оставила последици врз срцето.

– Ако срцевиот мускул бил воспален, тогаш тоа може да стане хронично, се јавува срцева слабост и тоа е најлошата фаза, таа е хронична – вели тој.

За Тулевски срцевите проблеми предизвикани од коронавирусот се вообичаено нешто. Тие се јавуваат кај луѓе од различни возрасти, но меѓу нив има и многу млади луѓе, објасни тој.

– Постојат различни категории (на луѓе), некои не беа дијагностицирани навреме поради епидемијата, а други се луѓето кои имале ковид-19 и нивните бели дробови или срце се оштетени. Третата група се луѓе кои имале срцев удар или белодробна емболија поради тромбоза. Има многу млади луѓе кои се погодени, сè уште нема точна статистичка бројка, но има многу млади луѓе – заклучува Тулевски.