Брнз до Џафери: Клучни се борбата против корупцијата, потеклото на инвестициите и законот за антидискриминација

Од клучно значење е во Собранието да се формира што поширока поддршка за реализација на стратешките цели, особено од аспект на НАТО и членството во Европската Унија, му порача на претседателот на Собранието Талат Џафери американската амбасадорка Кејт Мари Брнз на денешната средба. Таа додала дека еднакво значајни се и борбата против корупцијата, прашањата поврзани со националната безбедност и потеклото на инвестициите, како и донесувањето на законот за антидискриминација.

На средбата, Џафери изрази благодарност за поддршката што американската амбасада и САД и ја даваат на  Македонија, при што истакнал дека за нас е од суштинско значење задржаниот фокус на Соединетите Американски Држави кон нашата земја и  регионот во целина.

Џафери ја информирал амбасадорката Брнз за очекуваното ангажирање на новата влада во однос на пандемијата и мерките за зачувување на здравјето на граѓаните, за економските мерки за поддршка на населението и подготовката на стратегијата за започнување на преговорите за членство со Европската Унија, како три главни приоритети на дејствување. Т

Амбасадорката Брнз му честитала на Џафери за успешно спроведените парламентарни избори, за формирањето на институциите и за неговиот реизбор на функцијата претседател на законодавниот дом. Таа истакна дека, Република Северна Македонија има постигнато значаен напредок за кус период, особено на полето на евроатланската интеграција.