Јовановски: Враќање на економијата во нормала ќе се обезбеди со поддршка на здравствените власти (ВИДЕО)

Стопанската комора на Македонија  ја оцени како значајна најавата  на министерот за здравство, Венко Филипче дека од наредната недела се планира започнување на интензивна комуникација со претставници на стопанските комори за постепено нормализирање на работењето на компаниите.

Како што беше најавено  Министерството за здравство и Комисијата за заразни болести ќе им дадат јасна насока на економските оператори, на компаниите со производствени капацитети, на угостителите итн., за тоа како да го организираат работниот процес, со цел тој постепено да се врати во нормала откако ќе се донесат одлуки за олабавување на ригорозните рестриктивни мерки.

– Тоа ќе биде процес во кој сите вклучени луѓе одлично си ја знаат својата работа, од една страна докторите преку Министерството за здравство и Комисијата за заразни болести, а од друга страна искусни бизнисмени од страна на бизнис секторот. Со добра взаемна комуникација ќе можат да се оптимизираат ефектите за посакуваниот краен резултат – постепено враќање на економијата во нормала, а истовремено да се антиципираат и соодветно да се уредат и оперативните аспекти од ваквиот процес. Ова е важно затоа што и самите сектори во економијата имаат свои специфичности. И, што е најважно, сето ова да биде со максимална заштита на здравјето на граѓаните во текот на целиот процес на нормализација на економијата – вели во денешната видеоизјава Зоран Јовановски од комората.

Ваквиот начин на комуникација, вели тој, кога властите и бизнис заедницата, интензивно и квалитетно комуницираат уште во подготвителната фаза, пред да бидат донесени одлуки, е многу важен и корисен за да се постигнат посакуваните ефекти. Ова треба да се воспостави како урнек за во иднина за тоа како треба да се постапува пред носење важни одлуки што ја засегаат економијата и тоа да стане вообичаена пракса.