📽️ 📷 СОЛУН СЕ СОЛИДАРИЗИРА СО КОЧАНИ 60 минутен молк или по една минута за секоја жртва во дискотеката „Пулс“

Во моментов, на централниот плоштад „Аристотел“ во Солун се одржува собир на Македонците кои живеат и студираат во градот, како знак на солидарност со жртвите на трагичниот пожар во дискотеката „Пулс“ во Кочани.

Според информациите на Плусинфо, молкот е започнат, организаторите имаат транспаренти со пораки, а на собирот се придружуваат уште луѓе.

Иницијативата за овој собир беше покрената од Македонците кои живеат во Солун, а тие претходно најавија дека планираат 60-минутен молк, од кои секоја минута ќе биде посветена на една од жртвите, вклучително и за возачот на брзата помош, кој трагично почина откако помогна во превозот на повредените.

Како што може да се погледне на видеото насобраните луѓе молчат во знак на почит, рестораните и кафулињата во околината немаат пуштено музика, а единствено во позадина може да се слушне уличен музичар кој свири класична музика.

На собирот ќе бидат пуштени и црни балони во спомен на загинатите, а на социјалните мрежи се објави повик со натписот „Солун се солидаризира со Кочани“.

Во повикот за собирот, организаторите апелираат: „Како еден од засегнатите градови, каде што повредените добиваат нега, ве повикуваме да ни се придружите во изразувањето на нашето најдлабоко сочувство за изгубените животи, за повредените и нивните семејства. Соберете се со нас во момент на молк за да оддадеме почит на нивниот спомен и да покажеме поддршка.“

Идејата за собирот се родила по пристигнувањето на првите повредени во Солун и благодарение на големиот одзив за помош од Македонците во овој грчки град.