ПОЛИЦАЈЦИ ДА „ПАТРОЛИРААТ“ ВО АВТОБУСИТЕ НА ЈСП Градоначалникот Стефковски повикува на акција против ученичкото насилството
Градоначалникот на Општина Гази Баба минатата недела јавно ги информираше институциите дека во континуитет се случуваат инциденти во автобусите на ЈСП кои поминуваат од Ченто, преку Сингелиќ до Стајковци.
Вчерашниот немил настан во автобус на ЈСП кој возел низ општина Кисела Вода, кога со oстри предмети (веројатно ножеви) се повредени две деца, го наметна прашањето како да се спречи насилството меѓу младите во градските автобуси.
Градоначалникот на Гази Баба Бобан Стефковски објави дека заедно со полицајци од полициската станица Гази Баба се возел во автобус со број 65 од Автокоманда до Стајковци, релација на која често пати добивал поплаки дека се случуваат тепачки или физички напади врз деца кои одат или се враќаат од улилиште.
Пред една недела Стефковски ги алармираше надлежните органи, ЈСП и месните заедници во општината дека треба со заеднички напори, низ разговори и со конкретни мерки, да се работи на превенција на насилството, зашто сѐ почесто има случаи на повредени деца во општината.
– Се сретнав со средношколци, но и со граѓани, родители, со кои разговаравме за немилите настани кои минатата недела се случуваа во овој автобус и мојата порака до сите беше: насилството мора да запре! Полициски патроли ќе има во автобусите сѐ до целосно надминување на ваквите проблеми – изјави Стефковски.
Градоначалникот минатата недела јавно ги информираше институциите дека во континуитет се случуваат инциденти во автобусите на ЈСП кои поминуваат од Ченто, преку Сингелиќ до Стајковци. Тој упатил официјален допис до полициската станица со кој информирал за насилството и побарал присуство на полиција во автобусите. Воедно, одржал седница на Советот за превенција на која биле поканети преставници од месните заедници Сингелиќ и преставници од надлежни институции, кои по функција се членови на Советот.