ЗАПАДНОНИЛСКАТА ТРЕСКА ВО ОПАЃАЊЕ ПО ПИКОТ СО 11 СЛУЧАИ На неделно ниво има намалување на нови случаи
Пикот на западнонилската треска бил достигнат во 33. недела со 11 случаи, а здравствените власти сега бележат тренд на намалување на неделно ниво, информираше министерот за здравство.
На неделно ниво веќе има тренд на намалување на бројот на заболени од западнонилска треска – истакна денеска на прес-конференција министерот за здравство, Сашо Клековски.
На прес-конференцијата присуствуваше и Драган Кочински од Институтот за јавно здравје, кој рече дека во 33-тата недела имало пик со 11 случаи, а оттогаш во 34-тата недела бројот се намалува.
– Во Драчево има јасна причинско-последична врска со земјеното прскање на критичните зони. Се надевам дека следна цел ќе биде и реката Серава бидејќи поминува низ две општини и е поврзана со случаите. Благодарение на вонредните прскања во Драчево (вкупно три), од 9 август наваму немаме нови случаи од Драчево. Со двете прскања во Гази Баба на каналскиот систем очекувам и таму жариштата да бидат ставени под контрола. Во иднина ќе треба прскањето да се одвива посистематски и во следните пет години да се префрлиме од воздушно кон таргетирано земјено прскање на ризичните зони – додаде Клековски.