ПЕРЕЗ ХИЛТОН ХОСПИТАЛИЗИРАН ОТКАКО СЕ САМОПОВРЕДУВАЛ ВО ПРЕНОС ВО ЖИВО Блогерот ги вознемири обожавателите, службите веднаш интервенирале

Познатиот блогер и телевизиска личност Перез Хилтон бил пренесен во болница откако полицијата реагирала по повеќе повици поврзани со вознемирувачки пренос во живо на Тик-Ток. Според американските медиуми, гледачите пријавиле дека тој се повредува за време на емитувањето од неговиот дом во Мајами.

Службата на шерифот на округот Мајами-Дејд потврдила дека добиле повеќе итни повици и дека нивните службеници пристигнале на адресата. Тие утврдиле дека Хилтон бил сам во домот, а поради природата на ситуацијата пристапиле со техники за смирување и внимателна интервенција.

По интервенцијата, Перез Хилтон бил безбедно изведен од домот и пренесен со помош на итната медицинска служба во болница, каде што добива медицинска грижа. Од неговиот тим изјавиле дека се загрижени за неговата состојба и дека здравјето на блогерот и неговото семејство им е најважно.

Перез Хилтон, чие вистинско име е Марио Армандо Лавандира Џуниор, е роден во Мајами, Флорида, а јавноста го запозна како еден од најпознатите блогери за озборувања за славните личности. Тој е татко на три деца, кои ги добил со помош на сурогат-мајки. Во изминатиот период Хилтон се соочи и со сериозни здравствени проблеми – во март помина три недели во болница по компликации предизвикани од земање лекови за грип на празен стомак, што довело до чир, перфорација и сепса. Подоцна откри дека морал да оди и на итна операција поради опасен крвен тромб, а по тие искуства изјави дека многу повеќе сака да биде присутен за своето семејство и дека неговиот поглед кон животот целосно се променил.

Последниот инцидент повторно ја отвори темата за менталното здравје и важноста од тоа, луѓето кои минуваат низ тешки моменти, да побараат помош. Засега нема дополнителни официјални информации за неговата моментална состојба, а неговите блиски побараа јавноста да ја почитува неговата приватност.