НЕТАНЈАХУ СО НОВ ПЛАН ЗА ПОДЕЛБА НА ГАЗА Израел најави окупација на коридорот Мораг
Лоциран меѓу Кан Јунис и Рафа во јужниот дел на Газа, коридорот Мораг го носи името на поранешната израелска населба, евакуирана во 2005 година. Коридорот Филаделфија, по должина на границата Газа-Египет, е под израелска контрола од мај 2024 година.
Премиерот на Израел, Бенјамин Нетанјаху, најави дека израелската војска ќе ја преземе контролата над Коридорот Мораг во Газа, на сличен начин како што го контролира коридорот Филаделфија, објави Араб њуз.
– Ја преземаме контролата над коридорот Мораг кој ќе биде дополнителен коридор на Филаделфија – изјави Нетанјаху.
Тој додаде дека армијата се обидела да го обезбеди коридорот Мораг во вторникот вечерта.
Лоциран меѓу Кан Јунис и Рафа во јужниот дел на Газа, коридорот Мораг го носи името на поранешната израелска населба, евакуирана во 2005 година. Коридорот Филаделфија, по должина на границата Газа-Египет, е под израелска контрола од мај 2024 година.
За потсетување, во бранот израелски воздушни напади во текот на ноќта кон средата, загинаа повеќе од 40 Палестинци, речиси половина од нив жени и деца, според палестинските здравствени власти.
Во еден напад загинаа најмалку 19 лица во зграда на Обединетите нации, претходно клиника, која беше претворена во засолниште за повеќе од 700 раселени лица. Израел соопшти дека ги погодил милитантите на Хамас во „центар за команда и контрола“.
Во меѓувреме, повеќе од 9.500 Палестинци се затворени во израелските затвори, кои трпат тортура, глад и медицинско запоставување што уби многумина, според палестинските и израелските борци за човекови права, како и според извештаите на медиумите.
Израел започна ненадејна воздушна кампања врз Газа на 18 март и оттогаш уби повеќе од 1.000 луѓе и рани над 2.500 луѓе, прекршувајќи го јануарскиот прекин на огнот и договорот за размена на затвореници меѓу Израел и Хамас. Повеќе од 50.400 Палестинци се убиени во Газа во израелската воена офанзива од октомври 2023 година, повеќето од нив жени и деца.
Меѓународниот кривичен суд издаде налози за апсење на Нетанјаху и на неговиот поранешен министер за одбрана, Јоав Галант, во ноември минатата година, за воени злосторства и за злосторства против човештвото во Газа.
Израел, исто така, се соочува со обвинение за геноцид пред Меѓународниот суд на правдата поради неговата војна против енклавата.