ЛАНИ СЕКОЈ ГРАЃАНИН СОЗДАЛ 417 КИЛОГРАМИ КОМУНАЛЕН ОТПАД Но, дел од тој отпад не завршил на депонија туку расфрлан во природата

Секој жител на Македонија лани создал 417 килограми отпад или вкупно се создадени 755.789 тони комунален отпад, но дел од овој отпад останал расфрлан бидејќи од вкупното количество создаден отпад собрани се 639.668 тони.

Ова го покажуваат податоците кои денеска ги објави Државниот завод за статистика (ДЗС).

За разлика од 2024 година, вкупното количество собран комунален отпад лани е зголемено за 0,3% што, според Статистика, се должи на зголемениот број населени места вклучени во системот за колективно собирање отпад.

99,8% од комуналниот отпад, според ДЗС е складиран во депониите, а останатите 116.121 тон не се знае каде е складиран.

Најголемо количество собран комунален отпад е забележано во Скопскиот Регион – 178.953 тони или 28 % од вкупното собрано количество.

Од вкупното количество собран комунален отпад, 537.341 тон или 84% се собрани од домаќинствата, а останатите 16% од правни и физички лица (комерцијален отпад).

Според видовите отпад, најголемо количество собран отпад е мешаниот комунален отпад – 553.126 тони или 86,5 %, а најмало количество има отпадот од гума – 1.106 тони или 0,2 % од вкупното количество собран комунален отпад.

Лани се собрани и 34.757 тони органски отпад, 15.500 тони отпад од пластика, 10.217 тони хартија како отпад и 1. 879 тони метален отпад.