КРЕМЉ ОЧЕКУВА ВИТКОФ И КУШНЕР ДА ПРИСТИГНАТ ВО МОСКВА Путин и Трамп телефонски се договориле

Кремљ очекува дека специјалниот пратеник на претседателот на САД Доналд Трамп, Стив Виткоф, и Џаред Кушнер, зетот на Трамп, би можеле да допатуваат во Москва на разговори за Украина по потпишувањето на меморандумот меѓу САД и Иран, изјави денеска помошникот на претседателот на Русија, Јуриј Ушаков.

Ушаков наведе дека можноста за доаѓање на двајцата американски функционери уследила по неодамнешниот телефонски разговор меѓу претседателот на Русија, Владимир Путин, и Трамп.

– Како што соопштив по разговорот на нашиот претседател со господинот Трамп во неделата, очекуваме дека, по потпишувањето на договорот или меморандумот в петок, ќе се отвори можност двајца добро познати претставници, Виткоф и Кушнер, да допатуваат во Москва на состанок со нашето раководство – рече Ушаков.

Говорејќи за можното влијание на самитот на Групата седум врз ставот на Вашингтон кон украинската криза, Ушаков рече дека не е познато дали средбите за време на собирот ќе ја променат позицијата на американскиот претседател.

– Не знам дали некој ќе успее нешто да промени. Познато е дека претседателот на САД учествува на самитот на Г7 и дека таму ќе има низа контакти. Меѓу другото, познато е дека ќе се сретне со лидерот на киевскиот режим. Ќе видиме какви ќе бидат резултатите од тие разговори – рече Ушаков.

Тој додаде дека Путин и Трамп за време на последниот телефонски разговор не ја разгледувале можноста за организирање средба со претседателот на Украина, Володимир Зеленски, во Соединетите Американски Држави.