КАКО ЌЕ СЕ ЛЕЧИ КЕЈТ МИДЛТОН? Што е адјувантна хемотерапија, колку помага и колку е ризична

Британската принцеза Кејт Мидлтон објави дека е во „рана фаза“ на превентивен третман со хемотерапија, кој вообичаено се користи за да се намали ризикот од враќање на ракот.

И Кенсингтонската палата во петокот објави видео-изјава во која потврди дека принцезата има дијагноза на канцер. Ова било чувано во тајност повеќе од три месеци, откако била подложена на операција на абдоменот, а лекарите верувале дека нејзината состојба не е канцерогена.

– Тестовите, сепак, по операцијата покажаа дека ракот бил присутен. Затоа, мојот медицински тим ме советуваше да поминам курс на превентивна хемотерапија и сега сум во раните фази на тој третман – рече 42-годишната принцеза од Велс во видеото објавено од палатата.

Кејт и се заблагодари на јавноста за поддршката и побара „простор и приватност“ додека го завршува превентивниот третман со хемотерапија.

Но за каква превентивна терапија станува збор? Д-р Марлен Мејерс, онколог и директорка на Програмата за борба со рак во Центарот за рак Перлмутер изјави за „Њујорк пост“ дека, иако е тешко да се коментира за специфичниот третман на Мидлтон, бидејќи типот или фазата на ракот на принцезата од Велс е непознат – превентивната хемотерапија има за цел да се намали ризикот.

– Превентивната хемотерапија, која уште се нарекува и адјувантна хемотерапија, понекогаш се користи по отстранувањето на примарниот карцином за да се намали ризикот од негово повторување – објасни онкологот.

Третманот е погоден за некој кој е изложен на поголем ризик од развој на одредени видови на рак поради семејна историја, нивниот начин на живот или предканцерозна состојба.

– Често даваме превентивна хемотерапија за неколку видови рак за да се обидеме да ги искорениме микроскопските клетки кои не можат да се видат на скенирањата, но можат да растат ако не се лекуваат – додаде Мејерс.

Адјувантна терапија може да се користи кога другите методи на третман не се ефикасни, иако изборот да се подложи на превентивна хемотерапија зависи од видот и стадиумот на ракот, дали е приемчив за хормонска терапија и бројот на зафатени лимфни јазли.

– Придобивката од ова во голема мера зависи од стадиумот на ракот и видот на ракот, а за тоа немаме информации во случајот на принцезата од Велс – објасни Мејерс.

По успешното отстранување на канцерогените или преканцерозните клетки, микроскопските, незабележливи канцерогени клетки сè уште можат да останат во телото и да предизвикаат повторување на ракот со месеци или дури години по првичниот третман или по заминувањето во ремисија. Адјувантна хемотерапија – која може да трае со недели или години – ги напаѓа овие клетки системски и ја елиминира постоечката болест, намалувајќи го ризикот од повторување.

Лековите за хемотерапија ги убиваат брзорастечките канцерогени клетки, но можат да ги оштетат и здравите клетки, предизвикувајќи краткорочни гастроинтестинални несакани ефекти како гадење, повраќање, губење на апетит, дијареа, запек и губење на тежината.

Лековите исто така може да предизвикаат рани во устата, губење на косата, замор, анемија и многу повеќе, иако поздравите поединци имаат помала веројатност да доживеат несакани ефекти.

Сепак, постојат долгорочни последици од земањето лекови за хемотерапија, како рана менопауза или оштетување на срцето, белите дробови, бубрезите или нервите.

Додека со превентивната хемотерапија може да третираат многу различни видови рак, таа најчесто се користи кај пациенти на кои им е дијагностициран рак на дојка, дебелото црево или јајниците.

– Дури и ако ракот се ресецира за лекување, односно се отсече од телото во обид да се излечи болеста, може да има висок ризик од повторување, па може да се користи хемотерапија. Ова може да биде направено кај рак на дојка, јајници и дебело црево, меѓу другото. Специфичните лекови и времетраењето на третманот ќе зависат од видот на ракот – вели докторката Мејерс.

Британските медиуми потсетуваат дека ова е само еден од здравствените предизвици со кои се соочувала принцезата Кејт во текот на животот, па откриваат и други здравствени проблеми со кои се борела.

За време на бременоста со нејзините деца, Џорџ, Шарлот и Луис, Кејт се соочувала со тешки утрински мачнини кои барале хоспитализација. Оваа состојба, позната како hyperemesis gravidarum, може да доведе до тешка дехидрација и е сериозен здравствен предизвик и за мајката и за бебето. Кејт изјавила дека се борела со овие симптоми со медитација и техники на длабоко дишење.

Кејт Мидлтон е одлучна во својата борба и ја нагласува важноста на поддршката за секој кој се соочува со слични предизвици. Нејзиниот пример на храброст и сила дава надеж и инспирација за многумина кои се борат со болеста.