📷 163 ЧЕЛИЧНИ СТОЛБОВИ КОЛКУ ЕДИНАЕСЕТКАТНИЦА СЕ СПУШТААТ ВО ЗЕМЈАТА НА АВТОПАТОТ КАЈ БОТУН Николоски информира дека се применува најнова метода за стабилизирање на теренот

Со околу 250 бетонски столбови односно колови ќе се стабилизира земјиштето на најтешкиот дел од автопатската делница Кичево-Охрид. Од нив 163  се поставуваат на теренот кај Ботун, а останатите ќе се распределат на останатиот дел од автопатот, вклучувајќи и кај Кнежино, кај Кичево и на овој начин се решава најтешкиот дел од автопатот, изјави министерот за транспорт и врски Алексaндар Николоски кој денеска го посети градилиштето кај селото Ботун.

Николоски рече дека решението за стабилизирање на теренот поради лизгање на земјиштето го направиле  домашни и странски експерти и има прва примена во регионот.

– Се работи за црна графитна земја, која што е најнестабилна земја, којашто воопшто може да се најде. Таква е планината. Тука дополнително има многу вода, што може да се види по вегетацијата, околу нас и кога водата ќе се спои со графит, тогаш настанува една каша и нема никаква стабилизација. Тоа е причината зошто овој дел околу селото Ботун до сега беше невозможно да се изгради- рече Николоски.

Како што објасни на стабилизацијата на теренот ќе работат 5 машини кои тежат 130 тони. Три се веќе на терен, два ќе бидат донесени од странство.

– Секоја од овие машини влегува во земјата во должина од 20 до 28 метри. Тоа е помеѓу 7 и 11 ката зграда. Се влегува во земјата 7 до 11 ката надолу, се спуштаат арматурни кафези, секој арматурен кафез тежи по 30 тона железо и истите после тоа се поливаат со бетон. Помеѓу нив има цевки и има челични јажиња, кои што ги држат едните со другите и практично ние под земјата создаваме една целосна структура која што треба да ја држи основата на автопатот. Вакви решенија ќе се направат вкупно 250 на автопатот Охрид-Кичево коишто 163-те се кај Ботун, останатите се на останатиот дел од автопатот, вклучувајќи и кај Кнежино, кај Кичево и на овој начин се решава најтешкиот дел од автопатот – рече Николоски.

Николоски вели дека ова решение е новина во целиот регион и поради тоа е и предмет на интерес кај стручната јавност.

-Ова е убедливо инженерски најтешкиот дел и ова е делот кој што претставува новина не само Македонија, токму во целиот регион, нешто за што ќе се предава на факултетите и на исклучено најголемиот светски симпозиум на научници во делот на градежништвото од вчера почна во Скопје, денеска се предава токму за ова  – рече тој.