МИЦКОСКИ ГО ПОКАНИ РАДЕВ ДА ЈА ПОСЕТИ МАКЕДОНИЈА Премиерот не очекува подобрување на односите со Бугарија сè додека СДСМ коленичи
Се надевам дека со оваа влада на Бугарија ќе можеме да ги подобриме меѓусоседските односи и ќе може да разговараме за темите за кои треба да разговараме, рече премиерот Христијан Мицкоски.
Премиерот Христијан Мицкоски го покани бугарскиот премиер Румен Радев да ја посети Македонија.
Одговарајќи на новинарско прашања дали официјално ќе го покани Радев во посета на Македонија на средба на премиерско ниво, одговори дека не гледа причина зошто не би го сторил тоа.
– Не гледам причина зошто да не го поканам. Ако ова е поканата вака, еве го поканувам – изјави Мицкоски.
Во врска со тоа дали очекува затегнување на односите откога денеска бугарското Народно собрание ја избра новата влада предводена од Радев, а предложена од партијата Прогресивна Бугарија, Мицкоски нагласи дека тој не рекол дека очекува влошување, туку дека не очекува подобрување.
– Сè додека има котиња од СДСМ, кои коленичат и кои ги распродаваат македонските национални интереси, не очекувам подобрување. Наместо да застанат со нас и да се борат за македонските национални интереси, овие котиња одлучија за жолтици да коленичат таму. Инаку, што се однесува до господинот Радев, кога победи, јас тоа утро му честитав, му се јавив да имаме успешни добрососедски односи. Се надевам дека со оваа влада ќе можеме да ги подобриме меѓусоседските односи, ќе може да разговараме за темите за кои треба да разговараме – истакна Мицкоски.