ЖИЧНИЦАТА ТЕТОВО-ЛИСЕЦ-ШАПКА ЌЕ СТАНЕ РЕАЛНОСТ Касами ќе го крене Тетово на друго ниво ако добие втор мандат

Градоначалникот на Тетово, Биљал Касами, денеска ја презентираше платформата за работа доколку го добие вториот мандат. Тој рече дека првиот мандат бил наменет за итни интервенции, решенија за елементарни проблеми и регулирање на основната инфраструктура.

– Подготвени сме да го однесеме Тетово на друго ниво, со второто поглавје за развој. Бидејќи Тетово не смее да се врати во ерата на анархија, хаос, лошо управување и корупција. Тетово мора да продолжи да се развива уште побрзо. Затоа, со задоволство ви го претставувам деталниот план, со конкретни проекти и мерки, за продолжување на овој развој – рече Касами на прес-конференција.

Тој посочи дека имал многу консултации со соработници, експерти, граѓани, бизнисмени, невладини организации, млади луѓе со цел да ја изготви програмата за вториот мандат. Тој сега предлага да го води Тетово кон трајни стандарди наместо кон привремени решенија. Предизборната платформа е документ базиран на стратегии составени од релевантни експерти и институции.

– Второто поглавје ќе биде и поглавје на урбаната и инфраструктурната трансформација на Тетово. Тетово станува компактен, поврзан и зелен град. Го одобруваме Генералниот урбанистички план 2025–2035, пакет детални урбанистички планови од центарот до стадионот и по должината на булеварите Илирија и Илинден, планови за Попова Шапка, Урбан блок 57, Спортскиот центар и трговскиот центар. Ги забрзуваме процедурите за издавање дозволи, го градиме Плоштадот со подземен паркинг, ги завршуваме главните булевари, патните врски со селата и пешачките подвозници. Жичницата Тетово–Лисец–Попова Шапка станува реалност во соработка со Владата – посочи Касами.

Тој истакна дека животната средина ќе биде во нивниот фокус со проширување на зелените површини, создавање зелен катастар, садење на 5.000 нови садници, енергетска ефикасност во јавните згради, зелена инфраструктура и друго.