ОБВИНИТЕЛОТ КРСТОВ БАРА ИВА МИХАИЛОВА ДА МУ СЕ ИЗВИНИ ЗА КЛЕВЕТИТЕ Тврди дека не ѝ биле побарани пари за да добие условна казна

Јавниот обвинител, Игорчо Крстов, од ОЈО Кочани, застапник на обвинението против Ива Михаилова, упати барање до неа јавно да му се извини и да ги повлече изјавите изнесени во поткастот кај новинар во Бугарија.

Во соопштението што го цитираат македонските медиуми се наведува дека Михаилова изнела невистинити тврдења со кои го нарушила угледот и професионалната репутација на обвинителот.

Обвинителот преку ополномоштен адвокат реагира на нејзините изјави дека наводно ѝ се обратил со дискриминаторска порака поради нејзиното бугарско национално чувство, како и тоа дека преку посредник ѝ биле побарани пари за да добие условна казна.

„Согласно член 12 став 1 од Законот за граѓанска одговорност за навреда и клевета, се обраќаме до лицето Ива Михаилова со барање јавно да се извини на Игорчо Крстов и да ги повлече невистиностите и клеветничките изјави што ги изнесе против него преку Јутуб од 07.11.2026, јавно на ист или соодветен начин“, се додава во соопштението на кочанскиот обвинител и неговиот адвокат Аљоша Кацаров.

Крстов ги оценил овие наводи како клеветнички и бара нивно јавно повлекување.

Обвинителот на завчерашното рочиште побара да бидат набавени нејзините изјави објавени на социјалните мрежи, како и сите документи поврзани со нејзината здравствена состојба, вклучително и од „Мој термин“.

Михаилова го нарекла обвинителот „бугарофоб“ и го обвинила дека ѝ барал пари за полесна пресуда.