ВИНАРИЈА ПОПОВ ПОВТОРНО ОСВОИ НАГРАДА „BEST OF SHOW“ Виното „кратошија“ доминираше на натпреварот „Мундус вини“

Винарија Попов повторно ја освои наградата „Бест оф шоу“ (Best of Show) со своето вино „кратошија гран резерва 2021“ (Kratoshija Grand Reserve 2021) на натпреварот „Мундус вини самер тејстинг 2024“ (Mundus Vini Summer Tasting 2024) кој се одржа во Германија, во почетокот на септември, што го потврдува исклучителниот квалитет на вината и посветеноста на тимот на Винаријата.

Престижниот натпревар „Мундус вини“ е основан пред повеќе од 20 години и од самиот почеток е еден од најважните вински натпревари во светот. Секоја година на натпреварот учествуваат околу 12.000 вина од разни винарии низ светот. Панел од вински експерти од 40 земји прецизно го оценува секое вино. Натпреварот се фокусира на новите берби, овозможувајќи им на винариите да ги покажат своите најнови достигнувања.

На натпреварот оваа година имаше жестока конкуренција, со винарии од цел свет кои се бореа за признание. Конкуренцијата е сегментирана според земја, што овозможува фокусирана евалуација која ги зема предвид регионалните карактеристики и сортите на грозје.

Италија е лидер, но се истакнуваат и земјите од Источна Европа

Оваа година како лидер во генералниот пласман се најде Италија, а по неа следат Шпанија и Германија.

Сепак, источноевропските земји, вклучително и Република Северна Македонија, оставија значаен белег, освојувајќи вкупно 175 награди, нешто што ја покажува зголемената важност на регионот на глобалната винска сцена, а Винарија Попов повторно се истакна со својот квалитет. Триумфот на Винарија Попов на „Мундус вини“ не е нејзин прв успех на меѓународно ниво. Посветеноста на винаријата во постигнувањето врвен квалитет е постојано препознаена на реномираните вински натпревари ширум светот.

Само во 2023 година, Винарија Попов ја обезбеди наградата „Бест оф шоу“ на „Мундус вини“ за нејзината „кратошија резерва 2021“, а освои и златни медали за вината „карменер гран резерва 2018“ и „вранец резерва 2019“, а на натпреварот Декантер 2023 (Decanter 2023), освои сребрен медал за „карменер гран резерва 2018“.

Винарија Попов освои многубројни златни, сребрени и бронзени медали низ изминатите години на престижните натпревари „Мундус вини“, „Декантер“, „Премиум селект вајн челенџ“ (Premium Select Wine Challenge), „Челенџ интернешнал ду вин“ (Challenge International du Vin“) и на „Шардоне ду Монд“ (Chardonnay du Monde), „Мускат ду Монд“, итн. Постојаната извонредност на Винаријата Попов е кулминација на богатото винско наследство во регионот, прецизните лозарски практики и на квалификуваниот тим на винаријата. Ова најново признание на „Мундус вини“ ја зацврстува позицијата на Попов како фаворит во растечката винска индустрија во Македонија и го насочува вниманието на квалитетните вина што се произведуваат во Тиквешкиот регион.

Клучни карактеристики на наградуваното вино „кратошија гран резерва 2021“

Според белешките за дегустација на „Мундус вини“, виното „кратошија гран резерва 2021“ се одликува со извонредно сложена, но избалансирана арома. При пробувањето на ова вино доминираат традиционално карактеристичните ноти на црвена бобинка, џем, цреша, кои се избалансирани со пониските ноти на кафе, чоколадо, зачини и на дабово дрво. На втор степен доаѓаат нотите на нане и на сушено овошје, со мали примеси на чад, со што се создава одличен баланс на нотите „гурме“ со хербалните и дрвенестите ароми. Дабовото стареење на виното е евидентно во нотите на чад, кафе и чоколадо.

Виното „кратошија гран резерва 2021“ на натпреварот доби високи оценки во сите категории, што ја покажува неговата исклучителна рамнотежа и сложеност. Киселоста и астрингентноста на виното се добро избалансирани, што придонесува за неговата целокупна структура и потенцијал за стареење.

Винарија Попов ја поврзува модерната технологија со традиционалните методи

Винарија Попов е престижна винарија лоцирана во Сопот, во срцето на најпознатиот вински регион во Македонија и на Балканот, Тиквешкиот вински регион. Таа е создадена во 2001 година, со капацитет од 150.000 литри и 17 хектари лозови насади. Во текот на изминатите години вложено е извонредно многу во подобрување на технолошкиот процес за обработка на грозјето, како и во зголемување на капацитетот, но исто така и во комплетирање и надградба на човечките ресурси.

Денес винаријата поседува 60 хектари со нејзините внимателно одбрани и негувани лозја каде што грозјето зрее во идеални услови. Висококвалитетните вина произведени од Винарија Попов ја претставуваат комбинацијата на модерната технологија и знаење со традиционалните методи кои се користат со векови во Тиквешкиот регион. Вината на Попов имаат совршен баланс на овошни и цветни ароми кои се карактеристика на нивните сорти и на поднебјето.

Годишното ниво на производство од 200.000-300.000 шишиња овозможува одржливост на строга контрола на квалитетот во сите етапи на процесот. Во иднинa Винарија Попов планира да го одржува и да го подобрува квалитетот на секоја капка вино.