МАКЕДОНСКО ЗНАМЕ БИЛО ИСТАКНАТО НА РАБОТНИОТ РУЧЕК Бугарскиот амбасадор ќе треба да објасни зошто истото го немало во кабинетот на Радев

Македонското знаме било истакнато на работниот ручек кој претходеше на средбата меѓу македонската претседателка Гордана Сиљановска Давкова и бугарскиот претседател Румен Радев во Софија, велат извори од македонското Министерство за надворешни работи и надворешна трговија (МНРиНТ).

Заедничка фотографија била планирана само во работните простории на Радев. За инцидентот кој следеше потоа, каде македонското знаме не беше истакнато во претседателскиот кабинет на Радев при посетата на Сиљановска Давкова, денеска на бугарскиот амбасадор Желјазко Радуков ќе му биде врачена протестна нота.

Амбасадорот Радуков ќе биде примен од директорот на Директоратот за регионална соработка во министерството, како средба на пониско ниво. Од него ќе биде побаран одговор зошто македонско знаме не било истакнато и во Кабинетот на Радев.